Kryeministri Edi Rama i është përgjigjur sërish akuzave të Sali Berisha për shpenzimet e udhëtimeve me avion.
Kreu i qeverisë shqiptare ka publikuar në Twitter disa shifra që pretendon të tregojnë shpenzimet mesatare vjetore të Kryeministrit për udhëtimet jashtë vendit.
Sipas shifrave të publikuara nga Edi Rama, në vitin 2022, ai ka shpenzuar 120.459 lek të reja, ndërsa në vitin 2008, koha kur ishte Berisha kryeministër, janë shpenzuar 261.023 lekë.
Postimi i Edi Ramës:
“Tjetër shembull se si shpifja monumentale e miliona € për udhëtime me avion tregon, që rublaxhinjtë e opozitës dhe gjobaxhinjtë e ekraneve tallen me përbuzje me shqiptarët:
Shpenzimi mesatar vjetor i Kryeministrit për udhëtimet jashtë
2008 – 261.023Lek të reja
2022 – 120.459Lek të reja”, shkruan Rama.
Kryetari i PD-së, Sali Berisha kërkoi këtë të Premte dorëheqjen e kryeministrit Edi Rama, pas publikimit nga “Homeland Justice” të një liste me fluturimet që ka kryer kreu i qeverisë shqiptare. Berisha tha se Rama si kryeministër ka kryer 137 udhëtime me avion taksi, sipas tij, si asnjë kryeministër tjetër i Europës dhe botës. Berisha i quajti udhëtimet e Ramës një abuzim të madh dhe shtoi se vlera shkon të paktën 22 milionë euro.
