Këshilli i Emërimeve në Drejtësi ka përzgjedhur këtë të premte tre kandidaturat për vakancën në Gjykatën Kushtetuese.
Gent Ibrahimi është përzgjedhur i pari si anëtar me 88.38 pikë, ndërsa e dyta Arta Vorpsi me 88.22 pikë.
Arta Marku është përzgjedhja e tretë nga Këshilli i Emërimeve në Drejtësi për anëtare të Gjykatës Kushtetuese me 82.66 pikë.
“Në zbatim të nenit 239 të ligjit nr. 115/2016 dhe Vendimit nr. 5 datë 02.04.2019 “ Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, tashmë KED do të miratojë listën përfundimtare dhe Raportin e arsyetuar për procedurën e verifikimit, të vlerësimit dhe pikëzimit të secilit kandidat dhe të renditjes së tyre, për secilin vend vakant në Gjykatën Kushtetuese
Pas shqyrtimit dhe miratimit të këtyre akteve nga mbledhja e Këshillit të Emërimeve në Drejtësi, organit të emërtesës, Presidentit të Republikës, do ti dërgohet lista përfundimtare e renditjes së kandidatëve dhe raportet e arsyetuar të Këshillit, ku përmbahet analiza tërësore lidhur me plotësimin e kushteve ligjore dhe vlerësimin e kritereve ligjore për secilin kandidat, si edhe për procedurën e ndjekur për vlerësimin dhe renditjen e tyre.” thuhet në njoftimin e KED.
Pritet që nga kandidaturat Presidenti i Republikës Bajram Begaj të bëjë zgjedhjen e tij për të plotësuar vakancën në këtë institucion.
