Sekretari i Përgjithshëm i PD, Flamur Noka, ka reaguar në lidhje me dënimin e ish-kryebashkiakut të Lezhës Fran Frrokaj me 3 vite burg, për akuzën e tjetërsimit të pronave.
Noka e cilëson dënimin e ish-kryebashkiakut të Partisë Demokratike si pjesë të fushatës së kryeministrit Rama për të trembur dhe penguar faktorët opozitarë në prag të zgjedhjeve lokale.
Noka i bën apel drejtësisë dhe SPAK-ut që të shqyrtojë abuzimin e kryebashkiakëve socialistë.
REAGIMI I PLOTË NGA PD:
“Dënimi i Fran Frrokajt sot nga gjykata, është i dëshiruar nga qeveria dhe levat e Edi Ramës, që e kanë shtuar presionin ndaj bashkiakëve demokratë në vigjilje të fushatës për zgjedhjet vendore. Rama synon të trembë e të pengojë faktorët opozitarë, një mënyrë byzantine e njohur tanimë, e përdorur nga ai prej kohësh.
Ndërkaq, nuk ka se si të mos vihet re që:
-Kryebashkiakë socialistë që kanë sjellë falimentimin e njësive të tyre vendore
– Janë përfshirë në aferën më të madhe korruptive në vend, të inceneratorëve.
– Nuk preken nga drejtësia, madje janë në krye të përpjekjes së Rilindjes për të mbajtur sërish pushtetin me cdo kusht e me çdo mjet.
U bëj thirrje organeve të drejtësisë, e në veçanti SPAK-ut, të shohë e të shqyrtojë abuzimin dhe korrupsionin madhor të shumë prej të besuarve të Ramës nëpër bashkitë e vendit!
Mbrojtja kryeministrore që u ofrohet atyre, nuk mund të sjellë pandëshkueshmëri.
Ligji duhet të funksionojë pa ndikim e pa selektim, ndërsa drejtësinë e vërtetë do ta bëjnë qytetarët me votën e tyre më 14 Maj”
