Deputeti demokrat Gazment Bardhi dëshmoi këtë të Premte në Prokurorinë e Posaçme. Pas daljes nga ambientet e prokurorisë, Bardhi tha për gazetarët se ishte thirrur si kallëzues për inceneratorin e Elbasanit.
“Kam konfirmuar kallëzimin e bërë në emër të PD dhe inkurajoj SPAK për të përfunduar hetimet dhe çuar para përgjegjësisë gjithë personat përgjegjës”, tha Bardhi.
Ai bëri të ditur se deri tani s’ka asnjë zhvillim për sa i përket inceneratorit të Tiranës.
“I kemi dhënë besim SPAK-ut, duhet të na kthejë mbrapsht besimin. Qytetarët presin rezultate jo vetëm për këto tre inceneratorë që janë afera të pastra, por edhe çështje të tjera korrupsioni”, tha Bardhi.
“Kam kërkuar të merret në cilësinë e provës materiale gjetjet e komisionit parlamentar për inceneratorët, ka pasur një shtesë në kallëzim mbi bazën e frymës në komisionin hetimor dhe kam kërkuar që konkluzionet të jetë pjesë e hetimeve”, shtoi, “përsa i përket të kallëzuarve nisin nga kryeministri Edi Rama dhe deri te punonjësit që kanë firmosur”.
I pyetur për marrëveshjen e djeshme parazgjedhore Berisha-Meta, Bardhi u përgjigj: S’kam asnjë koment, se di pse e lidh marrëveshjen e djeshme me SPAK-un.
