Dhjetë persona janë marrë nën hetim nga SPAK, mes tyre ish-drejtuesja e ARRSH-së Sonila Qato, lidhur me tenderin e lotit të shtatë të rrugës Kardhiq-Delvinë. Prokuroria e Posaçme ka gjetur elementë të veprës penale “shpërdorim detyre” dhe “shkelje të barazisë në tendera”.
Të pandehur janë: Sonila Qato, Elona Godgo (motra e drejtoreshës së Inspektoratit Kombëtar të Mbrojtjes së Territorit Dallëndyshe Bici), Simon Prendi, Arbër Troka, Ariana Hasani, Erdit Salillari dhe Almir Hoxhaj. Këta persona akuzohen për veprat penale itë “Shpërdorimit të detyrës” dhe “Shkeljes së barazisë së pjesëmarrësve në tendera”, në bashkëpunim. Nën hetim janë edhe Nikollaq Mihali, Miranda Shkurti dhe Admir Pahumi.
Fillimisht ishte KLSH që zbuloi shkeljet dhe referoi materialet në prokurori.
Në 2020-n, ishte Kontrolli i Lartë i Shtetit kallëzoi penalisht Sonila Qaton dhe tre anëtarë të grupit të prokurimit që kanë vlerësuar ofertat për ndërtimin e tunelit në aksin Kardhiq-Delvinë.
KLSH ngriti dyshime për fiksim të tenderit me vlerë 23 milionë dollarë. Aty morën pjesë 6 kompani, ku 5 firma që paraqitën ofertën më të ulët u s’kualifikuan dhe fitoi kompania e cila dha shumën më të lartë për të realizuar punimet.
Kontrolli i Shtetit kërkoi dokumentacionin nga ana e Autoritetit Rrugor për këtë tender, por ai nuk iu vu në dispozicion. Pas shqyrtimit të dokumenteve elektronikë të sistemit, KLSH doli në konkluzionin se një firmë me një ofertë prej 611 milionë lekësh apo 6 milionë dollarësh më pak ishte s’kualifikuar, edhe pse përmbushte të gjithë kërkesat e garës. Kjo diferencë konsiderohet si dëm ekonomik nga ana Kontrollit të Lartë të Shtetit.
Pasi firma me ofertën më të ulët e ankimoi në një shkallë më të lartë, në Komisionin e Prokurimit Publik i cili i dha të drejtë, ARRSH nuk e zbatoi vendimin. Kjo konsiderohet si një shkelje me pasoja të rënda për interesat e shtetit nga ana e KLSH-së.
Për të njëjtën arsye, edhe kompania në fjalë e kallëzoi penalisht për shpërdorim detyre Qaton, në Shtator të 2019-s, ndërsa ajo, dy ditë më pas, dha dorëheqjen.
