Milano është përgjakur mbrëmjen e sotme nga një sulm me thikë që ka ndodhur brenda qendrës tregtare “Milanofiori” në zonën e Assago.
Sipas MilanoToday një burrë me origjinë italiane ka goditur me thikë 5 persona që ndodheshin brenda hipermarketit “Carrefour”.
Një prej personave të plagosur, që është punonjës i “Carrefour” ka ndërruar jetë. Ndërkohë në mesin e gjashtë të tjerëve është edhe mbrojtësi argjentinas i Monzas, Pablo Marì Villar.
Lojtari ndodhet në spitalin e “Niguarda”, jashtë rrezikut për jetën dhe i vetëdijshëm. Ai është vizituar edhe nga drejtori i përgjithshëm i klubit, Adriano Galliani dhe trajneri, Raffaele Palladino.
Dy prej të plagosurve raportohet të jenë në gjendje kritike për jetën. Mes dy të plagosurve rëndë, një 30-vjeçar me plagë me thikë në kraharor dhe në bark është shpëtuar me arrest kardio-qarkullues dhe është transportuar në spitalin Humanitas në Rozzano.
Të tjerët duken më pak seriozë për momentin, përfshirë edhe lojtarin e Monzas. Pothuajse të gjithë kanë plagë me thikë në gjoks.
Një grua 72-vjeçare, gjithashtu në spital, është qëlluar në dorë. Ndërkohë një grua 81-vjeçare është shpëtuar, por nuk u dërgua në spital pasi plaga nuk ishte serioze.
Mësohet se agresori është ndaluar nga forcat e shumta të policisë që ndodhen në vendngjarje, së bashku me 7 autoambulanca dhe një helikopter.
I arrestuari është 46 vjeç dhe sipas asaj që bëhet e ditur, në të kaluarën ka vuajtur nga çrregullime mendore dhe depresioni.
Ai dyshohet se mori një thikë nga raftet dhe filloi të godiste njerëzit e zgjedhur rastësisht, duke bërë që përkohësisht të përjashtohet pista e një sulmi të natyrës terroriste.
Një dëshmitar i sulmit me thikë tha për mediat se kishte parë “njerëz që iknin duke qarë”.
“Tani që jemi larg jemi më të qetë, por ishim vërtet të tmerruar, nuk e kuptonim se çfarë po ndodhte, pamë njerëz duke ikur me lot”.
“Më ka bërë shumë përshtypje një vajzë që qante, krejtësisht në shok”, shtoi dëshmitari.
