Atëherë kur Edi Rama dhe ministrat e tij kishin përdorur çdo medium për të bindur opinion publik se hakerat iranianë nuk kishin marrë të dhëna sensitive falë sulmit kibernetik në sistemet elektronike të Shqipërisë, HomelandJustice i zbuloi kryeministrit fluturimet me charter që nga 2015.
Në dosjen me 66 faqe të hakerave, bie në sy fakti që kreu i qeverisë nuk ka nguruar të përdorë avion privat për fluturimet nga Rinasi edhe në kohë krize, teksa më i fundit ka qenë në 5 tetor të këtij viti.
Menjëherë pas publikimit të materialeve reagoi me një postim në Facebook, kreu i PD Sali Berisha, i cili kishte denoncuar edhe në 2017 Ramën se në 4 vitet e mandatit të parë kishte shpenzuar 1.4 milionë dollarë për 132 fluturime jashtë vendit me çarter privat.
Por sot, Berisha akuzoi Ramën se në total ka shpenzuar për 127 udhëtimet shumë prej 19 milion eurosh, duke përllogaritur mandatin e dytë dhe të tretë të kryeministrit.
“Çdo udhëtim me Charter kushton mesatarisht apo më së paku 150 mijë euro kurse ato të largëtat kushtojnë me gjithë parkingun rreth 250 mijë euro. Por të llogaritura me çmimin 150 mijë euro fluturimi, Edi Rama ka shpenzuar vetëm avion taksi 19050000 Euro. Pra kryeministri i vendit më të varfër të Europës shpenzon për udhëtime me avion në dispozicion dhjetëra e dhjetëra herë më shumë se sa kryeministri i Austrisë, një vend dhjetëra herë më i pasur se Shqipëria”, shkruan Berisha në Facebook.
Sakaq pas publikimit të lajmit dhe akuzave që Berisha dhe deputetë opozitarë hodhën në drejtim të tij, Rama ka reaguar me një seri postimesh në Twitter.
Kryeministri thotë se udhëtimet e tij me charter janë realizuar për punë dhe për shpenzimet në lidhje me to ka një buxhet të caktuar, të përhershëm të qeverisë.
Duke mos marrë përgjegjësi dhe në mungesë të një përgjigje konkrete për akuzat mbi shpenzimet e luksit që kryen si nga opozita dhe nga HomelandJustice, Rama zgjedh të sulmojë duke përmendur financimet ruse dhe çështjen e non-gratave.
REAGIMI I RAMËS:
Sikur udhëtimet e mia të punës t’u kushtonin shqiptarëve sa llogaritë që bëjnë nongratat, spiunët dhe topat e mediave të baltës, unë do të isha thjesht njëri prej tyre, po nuk kam asgjë të përbashkët me ta që më ngatërrojnë me veten dhe me charter-at e tyre!
Avioni që unë përdor për udhëtime pune nuk është një charter komercial, po një avion për të cilin jam akuzuar edhe më parë nga të njëjtët delenxhinj dhe i kemi dhënë të plota faktet se pse dhe si konkretisht bëhet fjalë për shpenzime brenda buxhetit të gjithëhershëm të qeverisë!
Sot nuk kam ndërmend të risqaroj të njëjtën akuzë, për të cilën kush dëshiron mund t’i referohet sqarimeve të mëparshme, ndërkohë që qeveria iraniane dhe opozitarianianët shqiptarë e këndojnë atë njëzëri! Çfarë neverie!
