Tre persona janë arrestuar në kuadër të një operacionit të zhvilluar nga policia italiane nën koordinimin e Prokurorisë së Pordenones, në bashkëpunim me Policinë Shqiptare dhe SPAK.
Lajmin e bëjnë me dije mediat italiane. Sipas të njëjtave burime, hetuesit goditën një organizatë të specializuar në mashtrimet përmes tregtimit të rremë në internet. Skema kriminale raportohet se ishte veçanërisht komplekse dhe pastrimi i parave të përfituara ndodhi në disa vende anëtare të BE-së, duke përfshirë Qipron, Lituaninë, Estoninë, Holandën dhe Gjermaninë, me konvertimin në kriptovaluta.
Ndaj shtetasve shqiptarë, të gjithë banues në Tiranë, raportohet se janë ekzekutuar masat e arrestit me burg. Ata akuzohen se kanë mashtruar disa qindra italianë: shuma e mashtrimit është disa milionë euro.
Në përfundim të hetimeve u sekuestruan në Tiranë dy call center me mbi 60 postacione të pajisura me kompjuterë personal dhe dy serverë të lidhur me postacionet. Në të njëjtën kohë, në Itali u sekuestrua një server i përdorur nga organizata për të errësuar gjurmët e saj kompjuterike dhe për të penguar hetimet.
Raportohet se autoritetet kanë përgjuar mbi 42 mijë telefonata.
