Policia e Tiranës ka goditur 3 raste të veprimtarisë së paligjshme të lojërave të fatit në kuadër të operacionit policor të koduar “Fati i lojërave”.
Në këtë operacion janë vënë në pranga 3 shtetas që vinin baste sportive, nëpërmjet aparateve celulare, si dhe janë sekuestruar 3 aparatet celulare.
Në pranga ra shtetasi A. K., 46 vjeç, banues në Tiranë, pasi është kapur në flagrancë në ambientet e një subjekti bar-kafe, në rrugën “Petro Nini Luarasi”, duke vënë baste sportive me telefon. Po ashtu shtetasi L. P., 19 vjeç, banues në Babrru, si dhe A. Ç., 18 vjeç, pasi është kapur në flagrancë në ambientet e një subjekti bar-kafe.
“Strukturat e DVP Tiranë kanë organizuar kontrolle në lokale dhe ambiente të ndryshme, të cilat mund të vihen në dispozicion për organizimin e lotarive të palejuara. Si rezultat i kontrolleve janë evidentuar dhe goditur 2 raste të kësaj veprimtarie. Nga shërbimet e Komisariatit të Policisë Nr. 1 është arrestuar në flagrancë shtetasi A. K., 46 vjeç, banues në Tiranë, pasi është kapur në flagrancë në ambientet e një subjekti bar-kafe, në rrugën “Petro Nini Luarasi”, duke vënë baste sportive nëpërmjet aparatit celular.
Nga shërbimet e Komisariatit të Policisë Nr. 5 është arrestuar në flagrancë shtetasi L. P., 19 vjeç, banues në Babrru, pasi u kap në flagrancë duke vënë baste sportive, nëpërmjet aparatit celular, në ambientet e lokalit të tij, në Babrru, të cilin e kishte vënë në dispozicion për organizimin e kësaj veprimtarie të paligjshme. Nga shërbimet e Komisariatit të Policisë Nr. 6 është arrestuar në flagrancë shtetasi A. Ç., 18 vjeç, pasi është kapur në flagrancë në ambientet e një subjekti bar-kafe, në rrugën “Mikel Maruli”, duke vënë baste sportive nëpërmjet aparatit celular.” – njofton policia.
Materialet procedurale i kaluan Prokurorisë, për veprime të mëtejshme.
