Pasuri me vlerë 400 000 euro në pronësi të 34-vjeçarit Daniele (Oklid) Çela, i dënuar me 13 vjet burgim në Norvegji si pjesëtar i një grupi kriminal për trafikim të narkotikëve, janë sekuestruar në Elbasan dhe Peqin.
“Si rezultat i operacionit ‘Fasada 2’ u bë ekzekutimi i vendimit të Gjykatës së Shkallës së Parë Elbasan, e cila bazuar në provat e grumbulluara gjatë hetimeve të kryera nga Policia dhe Prokuroria, ka vendosur sekuestro preventive ndaj pasurive të shtetasit Daniele (Oklid) Çela, 34 vjeç, banues në Elbasan. Ky shtetas është dënuar me 13 vjet burgim, në Norvegji, si autor i tafikimit të lëndëve narkotike, në kuadër të një grupi të strukturuar kriminal, me aktivitet në këtë shtet”, njoftoi policia e Elbasanit.
Në zbatim të vendimit të gjykatës u sekuestruan pasuri të ndryshme të 34-vjeçarit, me vlerë rreth 400 000 euro: një apartament, një biznes (lokal) dhe garazhi i tij, në lagjen “Visarjon Xhuvani”, Elbasan dhe një ndërtesë dykatëshe, në Peqin.
“Nën drejtimin e Prokurorisë, vijon puna për të zbuluar asete të tjera të përfituara nga veprimtari kriminale, që ky shtetas dhe familjarët e tij mund t’i kenë regjistruar në emër të personave të tjerë. Ndërsa materialet i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme”, shtuan të njëjtat burime.
