Inter në fazën e 1/16 të UEFA Champions League. Skuadra milaneze formalizon kualifikimin me një fitore të thellë 4-0 kundër kampionëve të Çekisë, Viktoria Plzen.
Në minutën e 35-të Mkhitaryan shënoi golin e parë të ndeshjes me kokë pas një gjesti teknik për t’u lavdëruar nga Edin Dzeko. Kaq mjaftoi që “San Siro” i tejmbushur dhe në krahët e entuziazmit të shtynte skuadrën drejt golit të dytë që e gjeti Edin Dzeko.
Më i qetë Simone Inzaghi në pankinë dhe lojtarët në fushë që menaxhuan me mjeshtëri fitoren ndërsa Mkhitaryan për pak sa nuk gjeti edhe të tretin pasi e stampoi topin në shtyllë. Ishte mbrëmja e Edin Dzekos që shënoi edhe të dytin personal ndërsa 5 minuta nga fundi Romelu Lukaku u rikthye me gol pas rreth dy muajve mungesë.
Rreth 20 minuta për Kristjan Asllanin në këtë ndeshje ku zuri vendin e Hakan Calhanoglu. Sukses që e ngjit Interin në kuotën e 10 pikëve me sigurinë matematike të biletës së fazës tjetër, ndërsa Barcelona pavarësisht rezultatit sonte kundër Bayernit i thotë lamtumirë kompeticionit prestigjioz, ndërsa tashmë do të luajë në Europa League.
Në ndeshjen tjetër të pasdites, Porto shkatërroi po 4-0 Club Brugge duke u ngjitur në vendin e dytë të grupit B me 1 pikë më pak se kampionët e Belgjikës.
