Ka disa pikëpyetje që kanë shoqëruar vdekjen e mistershme të 32-vjeçarit Lear Kurti në duart e efektivëve të policisë së patrullës në Komisariatin Nr.3, të cilat lidhen kryesisht me reagimet e institucioneve shtetërore mbi ngjarjen.
Referuar këtyre pikëpyetjeve, eksperti i kriminalistikës Ervin Karamuço tha në studion e “Log” se janë 5 gënjeshtra të mëdha që janë ngritur për këtë ngjarje të rëndë. Ai theksoi se edhe autopsia e viktimës është bërë në shkelje të ligjit, në 5 të mëngjesit dhe jo pas 12 orësh që nga ndarja nga jeta e 32-vjeçarit.
“Ligji për autopsinë përcakton se një autopsi nuk kryhet pa u mbushur 12 orë. Në raste të jashtëzakonshme bëhet me përfundimin e 4 orëshit. Por kush janë këto raste. Ka raste për ngjarje shumë të ngutshme. Elementet e tjerë janë të lidhura. Ta kryesh brenda 5 orëve, nuk arrin që trupi të ketë proceset. Rastet përjashtuese janë shumë të jashtëzakonshme. Por pse është nisur ta bëjë kaq shpejtë? Në 5 të mëngjesit? Pa dal akti i ekspertizës? A ka pasur drogë? Në çfarë niveli ka qenë në gjak? Masa sa ka qenë e përdorur? Ato kanë 0.3-0.5 gram dhe nuk mendoj se sjellin menjëherë pasoja? Ai sapo është kapur ai ka qenë në gjendje të fikëti”, tha Karamuço.
Në vijim, Karamuço foli për armiq dhe dru të shtrembër në radhët e Policisë së Shtetit, të cilët po dëmtojnë imazhin e Uniformave Blu me veprimet e tyre.
Sipas ekspertit, policët e kanë kthyer historinë e ndalimit të qytetarëve në çështje personale dhe tentojnë të hakmerren kur dikush i shmanget arrestimit.
“Ca dru të shtrembër në polici po na prishin imazhin. Këto janë armiku i padukshëm që po dëmtojmë policinë. Gënjeshtra më e madhe është se qëndronte në market? Por jo ai ka qenë duke ecur. Në kamer nëse ti i lexon të drejtat një personi, nëse e prangos? Nëse ai nuk është i ndërgjegjshëm në kushtet e një problemi nuk e çon dot në komisariat por në spital. I jep ndihmë mjekësore. Në videon e dytë ato pamje janë se diçka ka ndodhur dhe tre policë janë zhvendosur dhe vetëm njëri mundohet të sjellë në ndërgjegje. Këto janë kode, dhe aftësitë e policive e kthejmë në një shenjë hakmarrje kur na ikën dikush”, u shpreh Karamuço.
