Një takim mbi dialogun strategjik midis qeverisë së SHBA-ve dhe Shqipërisë është duke u zhvilluar aktualisht në zyrat e DASH në Uashington, nga ku ka folu për disa tema të nxehta, zv/Ndihmës Sekretari i Shtetit për Evropën dhe Euroazinë, Gabriel Escobar.
Ai është pyetur nga gazetarët e Zërit të Amerikës lidhur me debatin e krijuar mbi Amnistinë Fiskale, një projektligj i propozuar nga kryeministri Edi Rama, që duket se po e përplas qeverinë shqiptare me BE dhe SHBA, të cilat e refuzojnë zbatimin e tij.
Eskobar nuk e ka mohuar aspak se projektligji që Rama kërkon të kalojë në Parlament ka disa problematika dhe nuk është i përshtatur me standardet ndërkombëtare.
Ai kërkon nga qeveria që shqetësimet e shprehura nga ndërkombëtarët të dëgjohen dhe thekson se në dialogun e sotëm do të shpjegohen më hollësisht në detaje pasojat që vijnë nga drafti në fjalë.
Ju thatë që takimi i sotëm do të përfshijë një gamë të gjerë çështjesh. Siç e dimë Shqipëria është një vend i pllakosur nga korrupsioni dhe kohët e fundit qeveria ka bërë të ditur një nismë për një amnisti të gjerë fiskale, deri në 2 milionë dollarë. Ka patur shqetësime nga FMN-ja, Banka Botërore, apo Bashkimi Evropian, se kjo mund të përdoret për pastrim parash. A ndajnë edhe Shtetet e Bashkuara të njejtat shqetësime?
Zv/Ndihmës Sekretari Escobar: Po edhe ne kemi disa shqetësime. I kemi diskutuar ato me qeverinë e Shqipërisë. Do t’i bëja thirrje qeverisë së Shqipërisë t’i dëgjojë këto zëra dhe ta përshtasë qasjen ndaj amnistisë fiskale që të jetë në përputhje me standardet globale dhe me kërkesat e BE-së.
A keni ndonjë qëndrim më të qartë, nëse kjo nismë duhet zbatuar, apo braktisur?
Zv/Ndihmës Sekretari Escobar: Nuk dua të hyj në thelbin e diskutimeve që do të kemi me zyrtarët shqiptarë sot, por do të kemi një dialog të hapur se cilat do të ishin pasojat.
