Nga të dhënat e deritanishme dhe nga deklaratat e ekspertëve, është bërë e ditur se sjellja e gabuar e efektivëve të Policisë kanë ndikuar në vdekjen e 32-vjeçarit Lear Kurti.
Duke marrë shkas nga këto raste që sa vijnë e shtohen edhe më tepër, ekspertët sugjerojnë se në çdo Komisariat duhet të bëhen seanca me psikologë apo psikiatër pasi ngjarjet e fundit po tregojnë se efektivët nuk dinë të përballën me qytetarët. Sipas kriminalistit, Artan Rexhepi, punonjësit e Policisë duhet t’i nënshtrohen kontrolleve me psikologë, pasi puna që ata bëjnë është e rrezikshme.
“Është e domosdoshme jo vetëm ti nënshtrohen testit por në shkollat e policisë të ketë psikologë, mundësisht psikiatër stacionar. Forcat e policisë janë forca të armatosura, mbajnë armë dhe përbëjnë rrezikshmëri, plus që dhe forca që për hir të vërtetës përballen me ngarkesë të lartë.”
Ai thotë se një vëmendje e shtuar duhet t’i jepet edhe Akademisë dhe policëve të rinj, pasi deri më tani efektivët e përfshirë në këto ngjarje të ngjarje të rënda rezultojnë të sapodalë nga shkolla e sigurisë.
“Nuk janë ngjarje që po ndodhin për herë të parë, kemi vetëvarje në Komisariatin e Kavajës, ngjarjet njëra pas tjetrës. E shenjtë është jeta e policit, por edhe e personit të shoqëruar.”
