Vizita e ditës së premte së Kryeministrit Edi Rama në shkollën 9-vjeçare “Naim Frashëri” në Elbasan është shoqëruar me denoncim nga ana e Partisë Demokratike.
Kryetari i Partisë Demokratike, dega Elbasan, Blendi Himçi, në një prononcim për median u shpreh se vizita ishte e turpshme nga ana e Kryeministrit pasi në vend që të vinte të rregullonte problemet e mëdha infrastrukturore që ka shkolla, vjen e mbjell fidanishte.
Himçi tha: “Ditën e premte, zoti Rama ishte i pranishëm në shkollën “Naim Frashëri”, një shkollë elitë që ka prodhuar dijetarë, që është krijuar në vitin 1909 dhe njihet si fidanishtja e shkollës Normale, që ka nxjerrë dijetarë si Aleks Buda, Dhimitër Shuteriqi dhe emra të tjerë akademikësh.
Sot kjo shkollë lëngon nga mungesa e infrastrukturës dhe e rehabilitimit dhe ristrukturimit të saj. I mungon ngrohja, që punon me dy turne dhe në një situatë ku mësuesit punojnë me mungesë të kabineteve. Sot që ne flasim kjo shkollë pavarësisht fasadës që kërkon të shfaqë Edi Ramë, ka realitet ndryshe. I bëj thirrje kryetarit të bashkisë të mos merret me fasada, por t’i kthejë identitetin dhe historijnë shkollës “Naim Frashëri”.
