Në prag të zgjedhjeve lokale 2023m ku opozita shkon e përfaqësuar me vetëm një bashki të sajën që është Shkodra, kreu i Partisë së Lirisë Ilir Meta ka zbuluar një nga prapaskenat që e çoi opozitën në këtë gjendje ku nuk ka anëtarë as në këshillat bashkiakë.
Nga Kuçova, Meta tha se përgjegjësi i vetëm për këtë mungesë përfaqësimi të opozitës është ish-kreu i Partisë Demokratike, Lulzim Basha.
Sipas Metës ka ekzistuar një plan i mirëmenduar mes Bashës dhe Ramës që opozita të digjte mandatet dhe të mos regjistrohej në zgjedhjet e shkuara lokale.
“Jemi gjithashtu përpara zgjedhjeve vendore dhe dua t’ju siguroj se qëllimi kryesor i PL është rivendosja e demokracisë në të gjitha këshillat vendore dhe Bashkitë ku sot, jo vetëm për shkak të Edi Ramës, por për poshtërisë e Lulushit opozita s’ka asnjë këshilltar në të gjithë bashkitë e Shqipërisë. Ishte Lululushi, i cili në mënyrë të koordinuar sepse e kishin kapur peng me dosjet dhe aferat që kishte bërë, ia mbyllën çështjen në Prokurori, kishte planifikuar me kohë djegien e mandateve, edhe mos hyrjen në zgjedhjet vendore”, tha Meta.
Në vijim ai zbuloi se Basha i kishte shkuar në zyrë duke iu lutur për shtyrjen e datës së zgjedhjeve, pasi më parë e kishin kritikuar ashpër në Gjermani për deklaratat që bënte në Tiranë ku pretendonte se kishte mbështetje nga Bundestangu për të “trazuar” politikën shqiptare.
“Ishte Lulushi mu luste dhe më qante mua për të shtyrë datën e zgjedhjeve vendore. Sepse i thanë ata në Gjermani “ore vagabond’ mos thuaj atje në Shqipëri se të kemi thënë ne “ik nga Parlamenti, e bëj rrëmujë Shqipërinë ti”. Prandaj i thanë do bësh namin, një shashkë përdori në media që u hodh, i thanë do të përjashtojmë nga Partia Popullore Evropiane. Edhe mu lut mua ai “aman derman anuloje që të hyjmë në zgjedhje të tjera, se kam bërë gabime”, edhe ma dha Lulushi datën mua, 13 tetor. Se ai tjetëri nuk donte datë fare, e kishte mbyllur me kohë, teatri ishte mbyllur. E lashë me 13 tetor”, rrëfeu më tej kreu i PL.
Madje ai theksoi më tej se ish-kryedemokrati është përfshirë në çdo aferë të qeverië Rama dhe ka përfituar financiarisht nga shfytëzimi i postit të liderit të opozitës. Sipas Metës, dyshja Rama-Basha kanë ardhur me mission të qartë për të shkatërruar Shqipërinë.
“Si e shpjegoni, mirë Rama s’donte zgjedhje vendore se i kishte mbyllur këto punë me kohë, po Lulushi nuk pranoi as të regjistrohej në KQZ thjesht për të më justifikuar mua si President që mora një përgjegjësi kaq të madhe që të mos përplaseshin në votime. U regjistruan të gjithë, ky jo. Respekto dekretin e Presidentit që e kërkove vetë, se linte Edi Rama. Nuk ka biznesmen më të talentuar se Luli, ka ardhur në Shqipëri me 0 investim dhe sot falë mashtrimeve të tij është kudo në çdo aferë me Edi Ramën, edhe sot janë bashkë që flasim. Duan të shkatërrojnë opozitën, erdhën nga jashtë në Shqipëri të dy, me porosi në Shqipëri, dhe sillen si kolonizatorët që shkonin në vende të tjera ‘merrni ca të merrni”. Por llogaritë i kanë bërë gabim”, shpjegoi Meta.
Por në fund kreu i PL theksoi se “pluralizmi do triumfojë shumë shpejt” dhe “llogaridhënia do jetë shumë shpejt për këto bastardë që kanë dhunuar Kushtetutën e Shqipërisë dhe kanë bërë teatër”.
“Ju siguroj që PL dhe Ilir Meta do jenë në krye të kësaj betejë që garanton rivendosjen e plotë të pluralizmit dhe ndëshkimin e merituar për të gjithë ata bastardë që duan të frikësojë shqiptarë, që vjedhin shqiptarët dhe duan t’i poshtërojnë. Ata i kanë bërë llogaritë shumë gabim dhe kam frikë se nuk do kenë kohë as të pendohet, sepse padurimi i shqiptarëve është i jashtëzakonshëm, përpjekjet e tyre për të instaluar regjimin monist kanë përfunduar. Në zgjedhjet e ardhshme vendore opozita do fitojë bindshëm dhe PL do të ketë një kontribut madhor për këtë çështje”, përfundoi Meta.
