Kryeministrit Edi Rama nuk i del inati me mediat dhe ata që bëjnë përgjegjëse qeverinë e tij për rritjen e çmimit të shportës bazë të ushqimeve, aplikimin e një fashe energjie apo shtrenjtimin e çmimit të karburantit.
Në këtë fazë përgatitore para fushatës së zgjedhjeve lokale, ku është parashikuar një tur i tij në çdo qark të vendit deri në fund të nëntorit, Rama ka zgjedhur t’ia lërë fajin për situatën e rënduar ekonomike Vladimir Putin dhe luftës në Ukrainë.
Por ai nuk harron të sulmojë as Brenda vendit, teksa tha sot nga Kafaraj i Fierit në një takim me fermerët se televizionet nuk pasqyrojnë në mënyrë të drejtë rritjen e eksporteve dhe përfitimet nga bujqësia në ekonomi.
Duke sqaruar se qeveria synon të arrijë në 500 milionë eksporte deri në fund të vitit, Rama tha se realiteti i fshatit dhe bujqësisë në Shqipëri është krejt ndryshe nga ajo çfarë thuhet se “në fshat vdes për bukë”.
E teksa në raportet e INSTAT për çdo tre mujor numri i gjedhëve dhe fermave bujqësore në vend del me zbritjem ndërsa qindra fermrë largohen çdo vit nga vendi duke lënë djerrë tokat bujqësore, Rama beson se fshati shqiptar ka të ardhme.
“Në TV dalin vetëm produktet që hidhen dhe jo të atyre që eksportohen. Po synojmë 500 mln euro eksporte. Po synojmë të arrijmë këtë vit gjysmë miliardin për eksportet, eksporte frutash dhe perimesh. Që kur morëm detyrën, toka që punohet është dyfishuar. Fshati shqiptar ka të ardhme. Krejt e kundërta e asaj që predikohet. Thonë se në fshat po vdesin për bukë, por realiteti është krejt ndryshe. Këtu fitohet më shumë sasa të punosh jashtë, te toka e babait fitohet më shumë”, tha kryeministri.
