Arsenali ka arritur të triumfojë përballë PSV-së. Granit Xhaka shënoi një gol spektakolar për ta afruar Arsenalin më pranë 1/8-ave të Ligës së Europës.
Rezultati i mundësoi skuadrës së Mikel Artetës të shkojë +5 nga holandezët në krye të Grupit A, duke ruajtur rekordin perfekt të katër fitoreve në po kaq ndeshje.
Gabriel Zhezus dhe Bukajo Saka patën shanset më të mira për londinezët, por paraqitja pozitive e portierit argjentinas, Valter Benitez, bllokoi tentativat e “Topçinjve”, duke ua vështirësuar mbrëmjen.
Arsenalit i duhet vetëm një pikë në ndeshjen e kthimit në Holandë pas një jave për të konfirmuar kualifikimin direkt në fazën e 1/8-ave, sepse vendi i dytë shkon në “play off” me ekipet që do të zbresin nga Champions-i.
Pas fitores ka folur dhe futbollisti shqiptar. “Ne patëm shans pas shansi dhe nuk patëm fatin të shënonim më herët. Por kishim pasionin për ta mbajtur topin, vazhduam të krijonim raste dhe mendoj se merituam të fitonim. Në pjesën e parë ushtruam shumë presion. PSV-ja është shumë e rrezikshme dhe ne e dinim që ata ishin kërcënues në kundërsulm. Por ne luajtëm shkëlqyeshëm”, tha lojtari i Arsenalit.
“Jam shumë i lumtur që shënova. Nuk më kujtohet kur kam shënuar për herë të fundit me këmbën e djathtë, por jam shumë i gëzuar. Nuk ka rëndësi kush shënon. Kjo na jep besim për ndeshjen e radhës. Kur fiton ti je i lumtur. Gjithçka po shkon mirë për momentin për ne, por nuk është surprizë. Po punojmë shumë. Ne fitojmë dhe humbasim si skuadër dhe jemi shumë të rrezikshëm. Donim të kualifikoheshim dhe jemi të kënaqur”, përfundon Xhaka.
