Në gjykatën e Elbasanit u zhvillua paraditen e sotme seanca e radhës gjyqësore për bosin turk të kriptomonedhave Farku Fatih Ozer, i cili u arrestua në Jug të Shqipërisë, duke bërë pushime, teksa prej mëse 1 viti Turqia i kërkonte autoriteteve shqiptare ta arrestonin.
Në këtë seancë pritej që Gjykata e Shkallës së Parë Elbasan të vendoste për ekstradimin e Ozer drejt Turqisë, por avokati mbrojtës i tij ka kërkuar sërish shtyrjen e seancës.
Edhe sot si në seancën e 6 tetorit shkak për shtyrjen është bërë mungesa e avokatit mbrojtës i cili kishte njoftuar me shkrim paraprakisht trupin gjykues.
Gjykata nga ana e saj kishte ofruar një avokat për të mbrojtur Ozer, por ai e ka refuzuar përfaqësuesin ligjor që caktoi shteti shqiptar. Në rrethana të tilla kryesuesi i seancës, gjyqtari Elis Dine ka vendosur shtyrjen e saj për në datën 1 nëntor.
Kujtojmë se Ozer është personazhi kryesor në dosjen e Prokurorisë së Stambollit për 21 të pandehur në lidhje me skemën gjigande të mashtrimit përmes kriptovalutave, Thodex, pasi akuzohet se ka fituar 2 miliardë dollarë nga kjo skemë.
Në rolin e CEO-s së kësaj platforme, Faruk Fatih Ozer akuzohet se ka mashtruar rreth 400 mijë njerëz. Ndërsa në burg aktualisht ndodhen edhe vëllai dhe motra e Faruk Ozer.
Prokuroria e Stambollit lidhur me këtë çështje ka kërkuar dënimin me burg në total të të pandehurve nga 12.164 vite burg deri në 40.562 vite burg.
