Kryetari i PD, Sali Berisha ka hedhur sot akuza të forta në drejtim të kreut të Agjencisë së Mbikëqyrjes Policore Arid Veliu dhe Ministrit të Brendshëm, Bledi Çuçi se kanë falsifikuar ekspertizën mjeko-ligjore për 32-vjeccarin Laer Kurti, që vdiq në duart e policisë.
Berisha tha se Çuçi i ka kthyer patrullat e policisë në “skuadra të droguarish”, të cilët gjëmojnë nga pas të rinjtë, por kjo s’do të thotë që duhet t’i marrin jetën për një kartë identiteti.
Ai gjithashtu shtoi se Ardi Veliu ka vendosur qesen në trupin e pajetë të viktimës, për ta paraqitur si përdorures kokaine.
“Tani thonë qesja. Qesja do jetë vendos me dorë. Se qesja do të kesh një filxhan vaj ulliri që të kalojë. Sesi kalon qesja nëpër ezofag e di vetëm Ardi Veliu. Po edhe të kishte qese, askush nuk thotë se është vdekjeprurëse”, tha Berisha.
Kreu i selisë blu kërkoi edhe dorëheqjen e menjëhershme të ministrit të Brendshëm, duke bërë thirrje edhe për protesta masive nga të rinjtë.
FJALA E BERISHËS:
Çfarë ndodhi pas kësaj, gjithçka u bë po kaq e shëmtuar sa krimi. U vërsulën kriminelë të tjerë me uniformë me në krye Ardi Veliun, për të falsifikuar çdo të dhënë, njoftuan se ndërroi jetë në spital, kur e dërguan kufomë.
Në kundërshtim absolut me praktikën e hetimit, ndërmorën autopsinë sikur të ishin klandestinë, në ora 4 të mëngjesit, e palejueshme për një akt autopsie, sidomos kur thua për vdekje natyrale, të japë rezultatin, duhet lënë të paktën 12 orë. Në një rast të tillë kur vdes një 32-vjeçar dhe është subjekt hetimi, autopsia bëhet nga grup ekspertësh dhe jo një të vetmi nën terrorin e Ardi Veliut.
Patrullat janë tërësisht të droguara. Patrullat këtu janë të mbushur me individë të droguar. Dhe në mënyrë absolute kam dyshime se këto i duan policë të droguar dhe kurrë policë normal. Pse u ndalua. Në qoftë se ai nuk është rrezik, nuk është i armatosur, nuk po kryen një vepër penale në flagrancë, po iku dhe e kap më vonë. Se kamerat aty janë. Se në këtë mënyrë patrulla e policisë mund të hasë në të rinj që o se kanë kartën e identiteti me vete ose tremben dhe ikin me vrap.
Po çfarë do të thotë kjo se duhet ti ndjekin dhe t’i vrasin. T’i marrin shpirtin. Kemi të bëjmë me një skenar, me të cilin e vranë për së dyti Laer Kurtin, një njeri normal, i rritur me vështirësi dhe sakrifica të mëdha nga nëna e tij. Për t’i a nxirre jetën, ia nxiu patrulla përgjithshme e Bled Çuçit dhe Edi Ramës. E dënoj, kërkoj largimin e menjëhershëm të detyrës të ministrit të familjes, që së bashku me Ardi Veliun janë të gatshëm të falsifikojnë çdo krim.
Nuk mund të kishte një çështje më të mprehtë më të dhimbshme se sa vdekja e një 32-vjeçari që po kthehej në shtëpi. Ishte dyfish krim. Pasi i morën shpirtin xhelatët, u hodhën pastaj në një lumë akuzash, shpifjesh trillime për të ndjerin. Ky është morali i Edi Ramës. Ndaj dhe ai ka një përzgjedhje të preferuar për njerëzit që sillen në këtë mënyrë.
Të rinjtë kanë dalë në një protestë, ftoj të gjithë qytetarët të bashkohen në protestë sepse pritet cili do të jetë i radhës që do të humbasë jetën nga keqtrajtime brutale.
