Luan Baçi, deputet i Partisë Demokratike, i ftuar në studion e “Debat” në A2 CNN, komentoi takimin e sotëm mes Edi Palokës dhe Gazment Bardhit, duke mos i cilësuar si negociata.
“Nuk ka negociata, por thjesht bisedime. Nuk mund të quash negociata brenda një partie, pavarësisht situatës së jashtëzakonshme të krijuara prej mëse një viti. Jemi në prag të zgjedhjeve dhe të gjithë deputetët, pavarësisht qëndrimeve të tyre, janë të përgjegjshëm dhe të ndërgjegjshëm para demokratëve, se duhet biseduar dhe duhet konkluduar që përfaqësimi i opozitës së bashkuar duhet të jetë me një kandidat të përbashkët. Duke parë që opozita në tërësi kanë qenë në biseda me Sali Berishën, edhe këto biseda mes deputetëve të PD-së janë të nevojshme”, tha Baçi.
Deputeti u shpreh se primaret janë të vendosura në statut dhe nuk i kthen dot më askush.
“Nuk mund të vendoset si kusht ajo që është e panegociueshme. Kur dy palë ulen në bisedime, e dinë mirë se çfarë është e paarritshme. Primaret mund t’i heqë vetëm një kuvend i jashtëzakonshëm i Partisë Demokratike. Një gjë e tillë nuk ka as kohë dhe as mundësi për t’u zhvilluar”, theksoi deputeti demokrat.
