Kryetari i Partisë Demokratike, Sali Berisha ka paralajmëruar protesta të fuqishme në mbështetje të kauzës së pedagogëve.
Gjatë mbledhjes së konstituimit të departamentit të Arsimit të Lartë dhe Shkencës në PD, Berisha theksoi se synimi i protestave do të jetë që të mos lejohet më rrokullisja e vendit nën regjimin e Ramës.
“Ne së bashku, duhet të bëjmë gjithçka për shpëtimin e Arsimit të Lartë dhe shoqërisë shqiptare. Ne jemi të bashkuar këtu, na bashkojnë mendimet, idealet tona. Duhet të bëjmë gjithçka që të jemi gjithnjë e më shumë, sepse ky po ndjek një politikë absolutisht kundër elitës së kombit. Ka një dekonsideratë totalë për mjekët, pedagogët, studentët. Ka një preferencë absolute për trafikantët, të inkriminuarit, por me përparësi absolute trafikantët të cilët zbatojnë çdo kërkesë të tij në narko-euro. Ndaj dhe kjo protestë e juaja është e një rëndësie shumë të madhe. Ne shumë shpejt ne do të fillojmë protesta të fuqishme në mbështetje të pedagogëve dhe nuk do ta lejojmë këtë rrokullisje të vendit. Janë përgjysmuar bizneset e vogla. Sepse nuk është tregu, është anti-tregu i krijuar sipas rikualifikimit që kanë bërë. Me ju do të bëjmë programin e arsimit të lartë dhe ju them se buxheti nuk mund të jetë më pak se 5% e GDP-së për Arsimin. Nuk mund të ketë konfiskim të lirisë akademike për ju. Do të bëjmë gjithçka për të rikthyer bashkëpunimin me të gjitha ekselencat shqiptare kudo që janë sot”, u shpreh Berisha.
Kërcënim ndaj elitës së kombit i konsideroi Sali Berisha paralajmërimin e Kryeministrit Edi Rama për kontroll të pasurisë për pedagogët. Kryedemokrati tha se kundërta do të ndodhë dhe se do jenë pedagogët ata që do t’i bëjnë vettingun Ramës.
“I kërcënon si në diktaturë, do ju bëjmë vettingun. Do i bëjmë ne vettingun e Surrelit atij. E mori detyrën e kryeministrit me saraje 570 metra pa asnjë faturë, me gënjeshtra. Do ja bëjmë vettingun, pas asnjë diskutim. E shoqja thotë se e ndërtuam me para të ‘Kurbanit’, vetë thotë me të emigracionit. 5 mijë metra e ka parkun dhe ky flet për pedagogët”, u shpreh.
Ai tha se Kryeministri nuk ka moral kur flet për pasurinë e pedagogëve, teksa i përmendi sërish udhëtimet e tij me avion: “Bën ky moral. Nuk ka Kryeministër të një vendi si ky që shëtit me avion në dispozicion, 150-300 mijë Euro udhëtimi. Pra ky tani do të shesë dhe moral”.
Ai ftoi edhe mjekët që nën shembullin e pedagogëve të ngrihen edhe ata në protesta për të shpëtuar sistemin shëndetësor në vend.
