Opozita pritet të dalë në shesh për t’i kërkuar llogari Edi Ramës për krizën ekonomike, rritjen e çmimeve dhe abuzimin me tenderat publikë.
Me shumë gjasë data e një proteste po afron, pasi këtë lë të kuptohet dekarata e dhënë sot nga Sali Berisha në selinë e Partisë Demokratike.
Pas kësaj, kreu i selisë blu ka thirrur një mbledhje të paplanifikuar me drejtuesit e qarqeve, duke vënë kështu në lëvizje PD për të diskutuar mbi këtë test të rëndësishëm në një kohë që qytetarët e kanë “lakun në fyt” nga qeveria.
Duket se planit për intensifikimin e aksionit opozitar i bashkohet edhe kreu i Partisë së Lirisë, Ilir Meta, i cili u pyet nga gazetarët për deklaratën Berishës dhe u përgjigj duke konfirmuar pjesëmarrjen në çdo tubim për të drejtat e shqiptarëve.
“Jemi me çdo protestë që bëhet në Shqipëri dhe inkurajoj dhe një herë pedagogët dhe grupet e interesit të shfrytëzojnë të drejtat që i jep kushtetuta për të mbrojtur të drejtat e tyre Protestat janë të domosdoshme për të përmbysur këtë regjim e sistem të korruptuar”, tha Meta.
Por, pavarësisht se gatishmëria e PL për t’u bërë bashkë me PD në tubime për hallet dhe problemet e qytetarëve, Meta duket se ka rezerva me aleatin kryesor përsa i përket kohës që Berisha po merr për të zgjedhur emrat që do të kandidojnë në 61 bashki, përballë “Rilindjes”.
Kreu i PL edhe sot i bëri thirrje kryedemokratit që të nxitojë me përzgjedhjen e figurave që do t’u paraqiten shqiptarëve si alternativë përballë “regjimit” të Edi Ramës.
“Nuk kemi lënë asgjë në dorë të askujt. Secili të marrë në dorë fatet e tyre. E rëndësishme është që PD të jetë sa më shpejt e qartë se kur dalin kandidatët para Rilindjes. Në zgjedhje do të votohet për kandidatë sepse kemi sistem mazhoritar. Për kandidatë konkretë, emra konkretë”, u shpreh Meta.
