Kryetari i Partisë Demokratike, Sali Berisha, foli në një emisionin televiziv për “vjeshtën e protestave”. Sali Berisha u shpreh se së shpejti e gjithë Shqipëria do të jetë në protestë ndërsa shtoi se mbështesin çdo kauzë të drejtë.
Kryedemokrati deklaroi se do të bëjnë një gërshetim protestash, ndërsa u zotua se do të anulojë ligjin për arsimin e lartë sapo të vijë në pushtet.
“Po punohet për protestat. Me protesta pjesore. Gjykoj se ndërmarrja e një seri protestash pjesore, është e dobishme, e drejtë. Pastaj kalohet në protestë të përgjithshme. Do tentojmë të bëjmë gërshetim protestash. Shqipëria do jetë e gjitha në protestë. Biznesi i vogël po vdes. Do jetë protestë me shoqata biznesi, duhet mbështetje, nxitje. Mësuesit janë të gatshëm për protestë, duan nxitje. Universitetet, studentët e pedagogët filluan me protesta”, tha Berisha, në ‘Çim Peka Live’.
“Do anuloj ligjin për arsimin e lartë, zotim solemn. Ai ligj anulohet menjëherë dhe miratohet një ligj i cili garanton autonominë e universiteteve. Universitetet sot me bord, po kancelari? Një komisar i vërtetë”, shtoi ai.
Berisha premtoi dhe dyfishim të bursave për studentët.
