Kreu i grupit parlamentar të Partisë Socialiste, Taulant Balla ka folur me projektligjet që do të propozohen në Kuvend.
Ai tha se ishte në dakordësi të plotë për projektligjin e lustracionit. Ndërsa foli edhe për projektligjet e dekriminalizimit dhe të partive politike, duke thënë se nuk mund të lejohej që në Shqipëri të kishte kryetarë partish të cilët kishin qenë ish bashkëpunëtorë të sigurimit të shtetit.
“Është një punë e rëndësishme që është bërë deri më tani. Natyrshëm që ne kemi marrë kohën për t’i konsultuar. Do t’i depozitojmë, shpresojmë që nesër të kemi një takim përfundimtar me grupin e punës që kemi ngritur. Një gjë është e sigurt, që do të depozitohen. Sa i takon dekriminalizimit, do shihet nëse kërkohet ndërhyrja në kushtetutë dhe e dyta në ligjin e partive politike, sikurse e kemi thënë që në Shqipëri nuk mund të jesh kryetar i një partie politike, me damkën e ish-bashkëpunëtorit të sigurimit të shtetit”-tha Balla.
