Një tjetër protestë u zhvillua në Tiranë këtë të shtunë.
Të verbrit kanë dalë në protestë sot para Pallatit të Kongreseve në Tiranë, ku kërkojnë zgjidhje nga qeveria për problemet e shumta që kanë. Në ditën ndërkombëtare të “Shkopit të Bardhë”, ata thonë se kërkesat e tyre kryesore janë për përmirsimin e kushteve të infrastrukturës, rritja e mbështetjes financiare e deri te sinjalizimet akustike që u mundësojnë një lëvizje pa shoqërues.
“Nuk kemi kushte, infrastruktura nuk na ndihmon. Pagesat që marrim janë shumë të ulëta për të përballuar koston e jetës. Me vështirësi mbijetojmë. Duhet të paguajmë drita, ujë, personin që kujdeset për ne. Nuk e di si ia dalim. Nuk kemi as ambiente për të lëvizur, për të dalë”, tha një nga protestuesit.
“Pensionet tona janë të ulëta. S’kemi kompensim për energjinë elektrike, duam më shumë të drejta për punësim, më pak barriera për shkollim. Në aspektin e infrastrukturës, nuk ka sinjalistikë akustike në mënyrë që ne të jemi të pavarur dhe të kalojmë në krahun tjetër të rrugës. Është ditë sensibilizimi për shtetin, pushtetin shtetëror dhe ekzekutiv, mund të bëjnë më shumë për qytetarët me probleme të shikimit. Gama e problemeve është e gjerë. Unë jam një nga të verbrit që deri vonë kam lëvizur me shkop në të gjitha zonat urbane të Tiranës”-tha njëri prej tyre.
“Ne përfaqësojmë njerëzit të vdekur, vetëm fjalë kanë. Vetëm na mashtrojnë! Jemi më të diskriminuarit. Kemi të njëjtat kërkesa si vitin e kaluar. Rritja e pagesës për ne, nga 2009 nuk është rritur. Të na ofrojnë mundësi reale për tu integruar në shoqëri, aksesi në informacion është shumë i rëndësishëm për ne”-u shpreh një tjetër.
Qytetarët deklaruan se marshimi i tyre protestë vijon drejt Bashkisë së Tiranës.
