Presidenti i Federatës Shqiptare të Futbollit, Armand Duka e ka veshur sërish me mister të ardhmen e stolit kuqezi, teksa foli për mediat pas një vizite në ekipin e Vllaznisë për futbollin e femrave.
Me Edi Rejan që është në prag të përfundimit të kontratës, Duka nuk la pa vlerësuar punën e teknikut, në atë që ai e quajti ndërtimin e një kombëtareje stabël dhe përfshirjen e shumë elementëve të rinj, padyshim referuar këtu Brojës, Bajramit dhe Asllanit.
I pyetur nëse Reja do të vazhdojë të drejtojë kombëtaren, Duka tha se në përfundim të kontratës palët do të ulen dhe do të diskutojnë me imtësi detajet.
“Reja ka një kontratë deri në fund të nëntorit, do të ulemi të bisedojmë me të dhe do të vendosim nëse do të rinovojmë apo jo. Do të bëjmë bilancet. Edy Reja ka dhënë një kontribut të rëndësishëm në zhvillimin dhe progresin e ekipit kombëtar. Në edicionin e fundit kemi qenë edhe pak të pafat, me shumë mungesa, me gola të pësuar në minutat e fundit”, tha kreu i FSHF.
Më tej Duka komentoi edhe emrat e lidhur me stolin e kombëtares, duke i mëshuar idesë se mund të ketë ardhur koha për një Teknik shqiptar dhe këtu përmendi Dajën, Josën e Bushin si favorit të mundshëm.
“Di Baggios i kemi ofruar dikur postin e drejtorit sportiv në FSHF, ndaj ka dalë emri në skenë, mund të jenë shumë trajnerë shqiptar, si Ilir Daja, Mirel Josa apo Alban Bushi ka shumë trajnerë me eksperiencë, pse të mos jetë një trajner shqiptar?”, u shpreh Duka.
