Kombëtarja shqiptare sapo ka njohur kundërshtarët për kualifikueset e Europianit që do të zhvillohet në vitin 2024 në Gjermani dhe fati i ka buzëqeshur pasi betejën do ta ketë me dy skuadra realitivisht më të përballueshme sesa BIG-ët e Europës, si Polonia dhe Çekia.
Por problemi që shqetëson ambientin kuqezi është fati i trajnerit Edi Reja, të cilit i skadon kontrata në muajin nëntor.
Nuk dihet ende nëse FSHF do të vendosë të rinovojë me teknikun italian dhe pikëpyetjet mbeten të mëdha për “timonierin” që do të drejtojë kombëtaren.
Një nga emrat e përfolur për t’u ulur në stolin kuqezi është edhe ish-ndihmësi i Xhani De Biazit, në kualifikimin historik të Shqipërisë në Europianin e saj të parë, Paolo Tramexani.
Aktualisht ai drejton Sionin në Superligën zvicerane dhe gjithmonë është shprehur se ndihet mirë aty, por nuk e fsheh dëshirën për të drejtuar Shqipërinë në të ardhmen.
Në një intervistë dhënë së fundmi për mediat, Tramexani shprehet se i ruan ende kontaktet me shumë njerëz në Shqipëri.
“Ata kanë qenë pjesë e punës sime dhe e jetës sime për katër vite që kam punuar aty. Me shumë prej futbollistëve që kanë qenë në Kombëtare komunikoj ende dhe shkëmbejmë mesazhe. Kam kontakte edhe me stafin aktual, mes të cilëve fizeoterapistin, doktorin dhe trajnerin e portierëve. Kam ruajtur një lidhje të fortë me ta dhe me persona që nuk kanë qenë pjesë e Kombëtares, por që i kam njohur gjatë periudhës që isha zv.trajner i Shqipërisë”, ka thënë strategu Italian.
Në vijim, Tramexani ndalet të analizojë grupin e lojtërave dhe shprehet se Shqipëria ka një ekip të mirë, ndërsa vlerëson edhe punën e Rejës.
I pyetur më pas nëqoftëse do të pranonte një ftesë nga FSHF për të marrë drejtimin e djemve kuqezi, ai nuk e ka fshehur aspak entuziazmin, duke thënë se një ditë do të rikthehet te Shqipëria.
“Një ditë unë shpresoj që të rikthehem në Shqipëri. Këtë ide e kam të ngulitur në kokë që nga dita që u largova nga ai vend. Më pëlqen ideja që një ditë unë të rikthehem dhe të jap kontributin tim dhe të bëj më të mirën. Por, ama sot e ardhmja ime është te Sioni, edhe pse një ditë uroj që të ndodhë rikthimi im në Shqipëri. Do të më lumturonte shumë dhe do të ndihesha krenar që të drejtoja Shqipërinë një ditë para se unë të përfundoj karrierën”, deklaron Tramexani.
