Deputeti Petrit Vasili ka komentuar ashpër fjalimin e kryeministrit Edi Rama në Asamblenë e Këshillit të Europës.
Gjatë një postimi në rrjetet sociale, Vasili ironizon duke shkruar se Edi Rama ngatërron “Strasburgun me Spiropalin”, duke shtuar se kudo ku shkon demonstron një imazh të keq dhe të pamerituar të Shqipërisë.
STATUSI I PLOTE NGA PETRIT VASILI:
“Shkollëpaku ngatërron Strasburgun me Spiropalin!
Shkollëpaku duke pasur Spiropalin edhe Ballën në krah ngatërron Strasburgun me Parlamentin e Lindita Nikollës, ku ky mund të zdërhallet dhe shkapërderdhet si të dojë.
Unë kam qenë anëtar i kësaj Asambleje Parlamentare të Këshillit të Europës për disa vite me radhë.
Por të tilla skena idiote nuk kane guxuar t’i bëjnë përpara asaj Asambleje as përfaqësues të vendeve të njohura për demokraci të kufizuar.
Kudo ku shkon ky, vetëm prish punë dhe vetëm demonstron padrejtësisht një imazh të keq dhe të pamerituar të Shqipërisë, që s’ka asnjë lidhje me këtë shkollëpak.
Shqipëria ka plot burra e gra, të rinj dhe të reja, që mund ta përfaqësojnë denjësisht kudo dhe është krim që sot përfaqësohet nga një shkollëpak dhe arrogant patologjik si Rama”, shkruan Vasili.
Fjalimi i Kryeministrit Rama ka ngjallur reagime dhe pakënaqësi, ndërsa disa prej përfaqësuesve të pranishëm në sallë e kanë shprehur zemërimin e tyre teksa ende nuk ishte mbyllur fjala duke replikuar ashpër me Ramën. Kujtojmë që Rama kërkoi nga Asambleja Parlamentare e Këshillit të Europës që të rrëzonin akuzat kundër Kosovës dhe të pranojnë kërkesën e Shqipërisë, për një raport vijues ndaj atij të Dick Marty-t.
