Kryeministri i Kosovës Albin Kurti gjatë mbledhjes së 100-të të Qeverisë të mbajtur ditën e sotme ka vlerësuar punën e kabinetit të tij, të cilit i atribuoi suksesin për zgjidhjen e disa problemeve të trashëguar nga e kaluara.
Kurti theksoi se gjatë qeverisjes së tij janë ndaluar ndërhyrjet politike në procesin e emërimeve publike dhe ka njoftuar se 3 milionë euro janë ngrirë në kuadër të hetimeve për financim të paligjshëm dhe pastrim të parave.
“Si moment është i përshtatshëm për t’i veçuar disa nga të arriturat kryesore dhe dukuritë jo të mira të trashëguara nga qeveritë e kaluara që i kemi ndalë, sfidat sistemore me të cilat po ballafaqohemi dhe po punojmë t’i rregullojmë dhe disa nga objektivat kryesore deri në fund të këtij viti”, tha Kurti në nisje të mbledhjes.
Në pjesën e kritikave Kurti nuk kurseu një pjesë të administratës ku theksoi se problem mbeten neglizhencat dhe vonesat në punë.
“Neglizhenca, vonesat në punë dhe jollogaridhënia nga pjesëtarë të caktuar të administratës dhe bashkërendim jo i mirëfilltë i donatorëve”.-shtoi Kurti.
Si kryefjalë për sukseset e Qeverisë së tij Kurti radhiti luftën kundër korrupsionit dhe theksoi se ky vit është në “konkurencë” me vitin e kaluar përsa i takon sukesit të qeverisë në këtë fushë.
“Një vit e gjysmë rritje dhe antikorrupsion, qeverisje socialdemokrate me stabilitet institucional, kemi rikthyer sistemin e financave në binar, duke ulur borxhin publik kundrejt bruto-produktit vendor për 27 përqind, 750 milionë mbështetje për qytetarët dhe bizneset. Kemi rritje historike në vendin tonë për vitin që shkoi me 10.7 përqind, ndërsa në çerekun e parë të këtij viti kemi 4.9 përqind të bruto-produktit vendor pasi që të zbritet inflacioni. Kemi rritje enorme të të hyrave buxhetore për vitin 2021, me trend të ngjashëm edhe për vitin 2022”.- përfundoi Kurti.
Kurti e mbylli fjalën e tij duke thënë se kabineti i tij ka miratuar ditën e sotme një sërë masash në kuadër të paketës antiinflacion në ndihmë të shtresave në nevojë për të përballuar rritjen e çmimeve.
