Polemikat kanë shpërthyer në Spanjë pasi një video nga aeroporti i “La Coruna-s” po qarkullon në rrjet dhe aty shihet mbërritja e kryeministrit vendas Pedro Sanchez më 5 tetor, ditë kur ai takoi kancelarin gjerman, Olaf Scholz, për një samit dypalësh (që nuk ishte mbajtur që nga viti 2014).
Takimi kishte në fokus çështje thelbësore si energjia dhe siguria, në një kohë që kriza ekonomike dhe recesioni kanë mbërthyer mbarë Europën, që pas shpërthimit të luftës në Ukrainë.
Por, siç shihet në videon që po qarkullon në rrjetet sociale, kryeministri spanjoll ka mbërritur me një eskortë të cilësuar si “shumë të ekzagjeruar”, pasi njëzet makina luksoze marshojnë në pistë.
Dhe, megjithëse 15 ministra nga të dyja qeveritë ishin të pranishëm në takim, shumë spanjollë vunë në pikëpyetje numrin e madh të makinave që u përdorën për të shoqëruar ata, sidomos në një kohë si kjo ku mijëra familje janë të prekura rëndë nga rritja e çmimeve.
