Kreu i Partisë së Lirisë Ilir Meta në konferencën me gazetarët ditën e sotme është pyetur lidhur me zërat që e shohin mjekun e njohur epidemiolog Ilir Alimehmeti si kandidatin e vetëm nga opozita që mund të mposhtë Erion Veliajn në garën për Tiranën.
Teksa zgjedhjet lokale janë shumë pranë dhe “motorët” e fushatës janë ndezur në të dy kampet e politikës edhe Partia Demokratike po shkon drejt bashkimit për të dalë me një kandidat të vetëm në çdo bashki, Meta duket se ia ka përgjegjësinë Sali Berishës për të zgjedhur emrat.
“Vlerësimet e mia mund t’i kem për cilindo, por nuk hyj në këto çështje kur përgjegjësinë e ka marrë një tjetër forcë politike dhe një lider tjetër, dhe që mendoj se duhet t’i japë zgjidhje sa më shpejtë”, tha kreu i PL.
Ish-Presidenti nuk preferoi të komentonte emra, por theksoi se opozita do të zhvillojë një betejë të ethshme për të rikthyer Tiranën te qytetarët dhe në shinat e një qeverisje të drejtë pa nënshtrim dhe gjobëvënie.
“Nuk mund të hyj unë në çështje emrash se nuk është përgjegjësi imja emri. As në Tiranë as gjëkundi në Shqipëri. Kjo cështje ka përfunduar për Tiranën e gjithë Shqipërinë. Në rast se ka ndonjë kandidat nga Partia e Lirisë që mendon se mund të na çojë drejt fitores unë jam i hapur të negociojë. Unë ju thashë do i kthejmë këshillat në Parlamente lokale. Dhe më i rëndësishmi do të jetë ky i Tiranës. Do të dëgjohen njëherë e mirë qytetarët. Do shpëtojnë përgjithmonë nga arroganca shtypja, intimidimi, nga gjobat pafund që marrin cdo ditë e gjithë ky represion”, deklaroi Meta.
