Ukraina u bë ditën e hënë shënjestër e sulmeve ajrore ruse, me raketa të cilat u nisën nga Bjellorusia. Nga 84 raketat e lëshuara nga Bjelloruaia, më shumë se gjysma u rrëzuan, sipas ministrisë ukrainase të mbrojtjes. Megjithatë, shumë prej tyre goditën objektivat, duke përfshirë qendrat e komunikimit dhe infrastrukturën civile.
The Times raporton se presidenti ukrainas Volodymir Zelensky e ka të qartë se çfarë nevojitet për të ruajtur sukseset e Kievit në luftë: akses në mbrojtjen ajrore më të mirë perëndimore për të mbrojtur infrastrukturën civile dhe ushtarake. Për këtë qëllim, ambasadat ukrainase janë udhëzuar të lobojnë tek aleatët për furnizime më të mëdha, për të përmbushur “prioritetin numër një” të Zelensky.Sulmi në të gjithë Ukrainën ka shtuar mbështetjen ndërkombëtare për të armatosur Kievin. Gjermania është hedhur në veprim pas katër muajsh premtimesh boshe duke dorëzuar raketat e saj të drejtuara tokë-ajër Iris-T SL të montuara në kamion , të cilat kanë një rreze veprimi prej 25 miljesh. Megjithatë, ekspertët thonë se për të mbrojtur civilët dhe ushtrinë e saj, Ukraina ka nevojë për më shumë sisteme të mbrojtjes ajrore. Udhëheqësit e G7 u takuan sot për të diskutuar një përgjigje perëndimore ndaj sulmeve, ndërsa ministrat e mbrojtjes të NATO-s do të takohen nesër dhe të enjten.Kievi ka marrë tashmë raketa tokë-ajër të epokës sovjetike S-300 nga Sllovakia, raketa portative Stinger nga SHBA dhe raketa Starstreak tokë-ajër nga Mbretëria e Bashkuar. Megjithatë, ajo që Zelensky dëshiron me të vërtetë është Nasams (sistemi i avancuar i raketave tokë-ajër), një sistem shumë i avancuar me një rreze veprimi prej 31 miljesh.Presidenti Biden është zotuar se tetë prej tyre do të dërgohen në Ukrainë, por janë ende disa muaj larg dorëzimit. Përshpejtimi i vendosjes së tyre do të shkonte shumë drejt neutralizimit të kërcënimit të sulmeve të rastësishme raketore ruse.“Ne kemi nevojë absolutisht që Shtetet e Bashkuara të tregojnë lidership dhe t’i japin Ukrainës sistemet e mbrojtjes ajrore. Dua të falënderoj Presidentin Biden për një vendim pozitiv që është marrë tashmë. Por më besoni, nuk mjafton as sa për të mbuluar infrastrukturën civile, shkollat, spitalet, universitetet, shtëpitë e ukrainasve që janë shkatërruar ose kërcënuar”, tha Zelensky dy javë më parë.Megjithatë, Justin Bronk, një studiues i lartë në Institutin Mbretëror të Shërbimeve të Bashkuara, një institut kërkimor për mbrojtjen, sugjeron që Nasams mund të mbrojë qytete të tilla si Kievi, Kharkiv dhe Lviv.“Përdoret kryesisht nga vendet e NATO-s, përfshirë SHBA-në, për mbrojtjen e qyteteve. Unë dyshoj se ato do të përdoren për të mbrojtur qytetet dhe infrastrukturën kritike”, tha ai.Megjithatë, madhësia e Ukrainës në krahasim me një vend të tillë si Izraeli, i cili ka mbrojtje ajrore shumë të mirë, e bën më të vështirë ofrimin e mbrojtjes totale për civilët dhe trupat.“Ukraina është vendi më i madh në Evropë. Nuk ka asnjë mënyrë që të vendosni një shtresë mbrojtjeje rreth gjithçkaje, “tha Bronk.
Kievi gjithashtu duhet të ruajë rrezen e tij superiore të artilerisë. Biden njoftoi muajin e kaluar se SHBA do të dorëzonte 18 sisteme Himars të tjerë me një rreze maksimale prej 50 miljesh.Një kombinim i Himars dhe M777, të cilët kanë një rreze veprimi prej 25 miljesh, kanë ndihmuar forcat ukrainase të mposhtin rusët në fushat e Ukrainës lindore. BM-30 Smerch ruse ka një distancë prej 43 miljesh.Përveç rimbushjes së rezervave të municioneve dhe dhënies së më shumë armëve të rënda, Kievi gjithashtu argumenton se furnizimi me tanke perëndimore do të përshpejtonte tërheqjen e rusëve. Vlen për tu përmendur se Ukraina ka kapur më shumë tanke nga rusët sesa ka marrë nga aleatët perëndimorë.Ukraina do të dëshironte gjithashtu që SHBA-ja të dërgonte Sistemin e saj Taktik Raketor të Ushtrisë, një raketë e shkrepur nga toka me një rreze veprimi prej 190 miljesh që është e aftë të mbajë dy herë më shumë eksplozivë sesa aftësia aktuale e Kievit.Ukraina argumenton se armët do të vepronin si një pengesë për sulme të mëtejshme raketore, por vendet perëndimore kanë hezituar të dërgojnë raketa me rreze të gjatë, nga frika se ato mund të përdoren për të goditur territorin rus dhe rrezikojnë përshkallëzimin.
