Partia Demokratike e ka gati raportin për heqjen e mandatit të deputetes së Partisë Socialiste, e cila mban edhe postin e ministres për Punët e Jashtme, Olta Xhaçka. Kjo e fundit akuzohet nga opozita se ka konflikt interesi për investimet strategjike që ka marrë bashkëshorti i saj. Në raportin prej 21 faqesh, demokratët kërkojnë që dosja të dërgohet në Gjykatën Kushtetuese dhe atje të vendoset për fatin e socialistes, duke përmendur edhe raste të tjera që janë zgjidhur nga ky institucion.
“Në rastin konkret, rezulton se mocioni i paraqitur është bërë me shkrim, eshte nëshkruar nga 14 deputete, dhe janë bashkëlidhur të gjitha provat. Në këtë kuptim, por edhe në zbatim te vendimit nr. 7/2016 te Gjykates Kushtetuese dhe nenit 9/1, pika 2 te Rregullores, Kuvendi ka detyrimin ta dërgojë çështjen në Gjykatën Kushtetuse siç ka vepruar më herët në rastin e Rakip Sulit, Koço Kokëdhimës dhe Valentina Leskajt,”– thuhet ne raport.
Demokratët kërkojnë që të mblidhet menjëherë këshilli i rregullores mandateve dhe imunitetit për ta kaluar raportin në seancë plenare. Po ashtu, sipas tyre, ministrja ka përfituar veprimtari që burojnë nga pasuritë e shtetit, përmes shoqërisë tregtare në pronësi të bashkëshortit të saj, Artan Gaci. Edhe ky dikur deputet i Partisë Socialiste. Por deri më tani nuk ka ende një datë për mbledhjen e Këshillit të Rregullores për mandatin e deputetes.
Si u denoncua rasti? Cila është lidhja me investimet strategjike?
Ishte Agron Shehaj ai që doli në një konferencë për shtyp dhe denoncoi se familja e ministres po përfiton nga pronat në bregdet, duke ua ‘dhuruar’ familjarëve të saj. Në skemën e ngritur nga Shehaj më 25 qershor 2021, kunata e ministres Xhaçka Tawni Lin Grzych-Sutton, një shtetase 30-vjeçare nga Masaçusets i SHBA, e cila prej vitesh bashkëjeton në Tiranë me vëllain e Xhaçkës. Më 2 mars 2022, kunata e ministres Xhaçka merr pronën në përdorim në bregdet.
Me firmën e Kryeministrit Rama, kompania “AG.Tç” SH.P.K në pronësi të bashkëshortit të ministres Xhaçka, shpallet investitor strategjik për ndërtimin e resortit në Dhërmi, i cili parashikon marrjen e tokës në bregdet në përdorim për 30 vite. Kryeministri Rama ndryshon vendimin e datës 22/02/2021 dhe shton kompaninë e kunatës si investitore strategjike. Vetë Gaçi i pyetur për mediat ka thënë më herët se është ai investitori por nuk ka deklaruar se shtetasja amerikane në fakt është njohje e tij dhe krushqi e të shoqes ministre.
