Përplasjet në distancë dhe refuzimi i ftesave nga ana e Enkelejd Alibeajt përkundrejt kryetarit të Partisë Demokratike Sali Berisha duket se nuk mund të vazhdonin më gjatë, duke parë se sfida e përbashkët është me kryeministrin Edi Rama.
Pas mbledhjes së sotme në ambientet e Kuvendit të grupit të deputetëve që janë rreshtuar me të, por që e vendosën në presion gjatë javës që shkoi për të dalë në garën për zgjedhjet lokale të vitit 2023 me një kandidat të vetëm, Alibeaj është dorëzuar dhe ka pranuar të bëjë “paqe” me Berishën.
Të paktën këtë të lë të kuptosh njoftimi që Grupi i tij ka publikuar për mediat, ku thuhet se mandatohet deputeti Gazment Bardhi për t’i dhënë drejtim negociatave për “bashkimin” me Partinë Demokratike dhe më pas me të gjithë opozitën kundër Ramës.
DEKLARATA PER MEDIAT:
Pas diskutimeve në Grupin Parlamentar të Partisë Demokratike, deputetët në mënyrë unanime shprehën vullnetin e plotë dhe të sinqertë për të gjetur format e duhura të bashkëpunimit për zgjedhjet lokale fillimisht duke nisur me të gjithë Partinë Demokratike dhe me çdo faktor opozitar.
Në vlerësimin e Grupit Parlamentar të PD zgjidhje e vetme për tu përballur me regjimin e Edi Ramës në zgjedhjet lokale është bashkimi i çdo zëri opozitar dhe përballja me një kandidat të vetëm të PD dhe opozitës në zgjedhje.
Me qëllim diskutimin e çdo mundësie të sinqertë për bashkëpunim, Grupi Parlamentar i Partisë Demokratike ka mandatuar zotin Gazment Bardhi për të kontaktuar dhe për të hulumtuar çdo mundësi bashkëpunimi dhe daljes në zgjedhje lokale me një kandidat të vetëm të PD dhe opozitës.
Grupi Parlamentar i PD-së shpreh gatishmërinë për të nisur që sot nga puna për të gjetur modalitetet e bashkëpunimit mes demokratëve në zgjedhjet lokale.
