“Amnistia fiskale do të bëhet, sepse e kërkojnë shumica dërrmuese e shqiptarëve. Kush jemi në qe të privojmë shqiptarët nga e drejta e tyre për të formalizuar të ardhurat e tyre. Këtë ligj e kërkon mbi 60% të njerëzve të këtij vendit dhe ju qani hallin se sa do të mërzitet BE-ja dhe Amerikës”.
Kështu deklaronte dy javë më parë kryeministri Edi Rama, me tone të ashpra pas një mbledhje të Këshillit të Ministrave, duke i hapur sfidë Bashkimit Europian dhe SHBA-ve me projektligjin e tij për Aministinë Fiskale që do të legalizonte paratë e pista të kontigjentit kriminal shqiptar, në ekonominë e vendit.
Pavarësisht se është në dijeni të faktit se i duhet shumicë e cilësuar në Parlament, pra 84 vota (të cilat nuk i ka) për të ngritur në një tjetër dimension partneritetin e tij me bandat dhe sigurimin e financimit prej tyre në prag të zgjedhjeve lokale të verës së ardhshme, Rama dukej i bindur për të ecur përpara me idenë e tij.
Por, shpresat duhet thënë se iu shembën sot dhe ranë përtokë me deklaratën e përfaqësuese së Fondit Monetar Ndërkombëtar, Yan Sun, e cila ia tha në sy ministres së Financave, Delina Ibrahimi se nuk mund të formalizohet ekonomika me paratë e pista.
Në emër të FMN, Sun ishte mëse e qartë në mesazhin e saj teksa e cilësoi draftin një biletë të eksponentëve kriminalë, që ua lehtëson atyre aksesin në ekonomi dhe u lejon t’i shmangen ndjekjes penale dhe sistemit të taksave.
“Së pari amnistia mund të konsiderohet si dëmtim për moralin tatimor, si kartë për të dalë nga detyrimi pagesës tatimore dhe për të ndihmuar evazorët sepse përfshin një falje të konsiderueshme të tyte për heqje të penaliteteve që mund të japin imunitet nga ndjekja penale dhe nga kontrolli konstant i ligjit”, tha përfaqësuesja e FMN-së.
Por, duket se shuplakën e mëngjesit nuk e ka kapërdirë lehtë kryeministri, i cili ka nxjerrë në dyert e Kuvendit besnikun e tij Taulant Balla, për të bërë avokatin e Amnistisë Fiskale.
Në një kohë që presioni i kryeministrit duket se funksionoi, Balla i pyetur nga gazetarët sesi do t’i siguronin votat për projektligjin, e ktheu anën e medaljes duke vendosur theksin te nevoja e formalizimit të ekonomisë dhe legalizimit të parave që i shkon për mbarë të gjithë qytetarëv shqiptarë.
“Ajo që duhet të kuptojmë është që në vlerësimin tonë. Besoj se edhe ju mediat duhet të verifikoni mbështetjen që ekziston në publik për amnistinë fiskale. Na rezulton që 2/3 e shqiptarëve e mbështesin, është një domosdoshmëri që Shqipëria të kalojë në një fazë tjetër nga tranzicioni që ka kaluar nga një kohë që ishte e shoqëruar me informalitet. Duhet t’u japim një mundësi, duke përjashtuar çdo të ardhur nga aktivitetet kriminale”, tha Balla me tone të zbutura, ndryshe nga shefi i qeverisë.
Dhe si për të tentuar që t’i mbushë mendjen ndërkombëtarëve se ajo që propozon qeveria shqiptare është e duhura, kreu i Grupit të PS e lidh Amnistinë me rrugëtimin europian të Shqipërisë, duke paralelizuar me kalimin e Greqisë nga dhrahmia te monedha euro.
“Natyrshëm duke bërë diçka që ka bërë pjesa më e madhe e BE-së, gjatë kohës së anëtarësimit në BE. Përshembull, Greqia e bëri në vitin 2004. Kalimi i Greqisë nga Dhrahmia tek Euro solli një domosdoshmëri për ta bërë. Ne do ta bëjmë këtë gjë dhe çdo deputet duhet të kuptojë se kjo është një gjë shumë e mirë për të gjithë qytetarët shqiptarë. Nëse lufta me predha, me tanke, ndodh në Ukrainë, inflacioni i kësaj lufte prek të gjitha vendet. Kështu që ky është synimi ynë, të dialogojmë më të gjithë deputetët e Kuvendit të Shqipërisë që të kuptojnë se ky është një qëllim për t’i shërbyer vendit”, shtoi më tej Balla.
