Një 53-vjeçar, është arrestuar këtë të premte nga policia pasi theu masën e sigurisë “Arrest në shtëpi” dhe tentoi të korruptonte punonjësit e Policisë, duke iu ofruar rreth 2000 euro.
Policia bën me dije se B. M., ka tentuar të ndihmojë djalin e tij 18-vjecar,pasi ky i fundit transportonte me një automjet tip furgon, kundrejt fitimit, 59 emigrantë nga vendet e treta, me qëllim kalimin e paligjshëm të kufirit
“Bazuar në informacionet e siguruara nga hetimet proaktive, gjatë operacionit u godit një rast i transportimit të emigrantëve nga vendet e treta, kundrejt fitimit. Si rezultat u vu në pranga shtetasi B. M., 53 vjeç dhe u shpall në kërkim djali i tij, shtetasi G. M., 18 vjeç, të dy banues në Kukës. 18-vjeçari transportonte me një automjet tip furgon, kundrejt fitimit, 59 emigrantë nga vendet e treta, me qëllim kalimin e paligjshëm të kufirit. Ky shtetas ka mundur të largohet, duke përfituar nga errësira. Vijon intensivisht puna për kapjen e tij. Shtetasi B. M., babai i 18-vjecarit, ka thyer masën e sigurisë “Arrest në shtëpi”, të caktuar nga Gjykata, për veprën penale “Dhënia ndihmë për kalim të paligjshëm të kufirit” dhe ka tentuar të korruptojë punonjësit e Policisë, duke iu ofruar rreth 2000 euro, me qëllim që të mos kryenin veprime procedurale për këtë rast”, njofton policia.
Gjatë kontrollit fizik, këtij shtetasi iu gjetën 11460 euro dhe 5000 lekë, të cilat u sekuestruan në cilësinë e provës materiale, së bashku me automjetin.
Materialet i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme
