“Sot dëgjoj që grup deputetësh të kësaj partie në mënyrë të pavarur kanë dorëzuar një draft me 94 bashki. Unë mendoj se ky draft i dorëzuar dhe ky që është më i thelluar në çdo aspekt le të ulemi bashkërisht dhe të arrihet në një draft të PD-së. Mendoj se duhet të diskutohet dhe me partitë e tjera aleate në Kuvend”.
Kjo ishte ftesa e parë e hapur për bashkëpunim që iu drejtua grupit të deputetëve të Enkelejd Alibeajt nga kryetari i Partisë Demokratike Sali Berisha, dy ditë më parë në një mbledhje grupi në selinë blu.
Madje kryedemokrati shkoi më tej teksa konfirmoi se ka patur bisedime që janë udhëhequr nga Edi Paloka me grupin e Alibeajt për të bashkuar PD dhe për t’u organizuar në mënyrë që të dilet me një kandidat të vetëm në zgjedhjet lokale 2023.
Ndërkohë, ditën e sotme Berisha e la sërish të hapur derën, duke e përmendur me emër Alibeajn, të cilit i kërkoi të marrë pjesë në mbledhjet e Grupit dhe të bëjë propozimet e veta, por duke pasur parasysh se kriteri bazë janë primaret për zgjedhjet lokale.
“Në Tiranë do të kemi kandidaturë të përbashkët e cila do të dalë përmes primareve. Nga primaret nuk heqim dorë, kjo është kategorike. Alibeaj të marrë pjesë dhe të bëjë propozimet e veta. Këtë herë nuk voton vetëm anëtarësia por edhe simpatizantët”, deklaroi Berisha.
Por, ftesa e liderit të PD duket se nuk është pritur edhe aq miqësisht nga Alibeaj, i cili në një intervistë për News24 tha se PD, ajo forcë politike që ai e konsideron ligjore dhe që përbëhet nga grupi tij do të këtë kandidatët e saj në zgjedhjet lokale.
Një deklaratë që mund të interpretohet si një sfidë e hapur për Sali Berishën kjo e Alibeajt, i cili lë të kuptohet se opozita do të ketë 2 palë kandidatë, duke qenë se grupi i tij nuk ka ndërmend të njohë as primaret.
Berisha ka bërë një ftesë në lidhje me reformën territoriale që dy grupet të bëhen bashkë. Si i përgjigjeni ju ftesës së tij?
Unë i përgjigjem ftesës së një deputeti, qoftë edhe ky zoti Berisha. Unë kam një detyrim edhe si kryetar i grupit parlamentar, që reforma territoriale të jetë një mishërim i interesave, një mishërim i angazhimit politik dhe partiak të çdo deputeti të grupit të PD. E kam bërë këtë që në fillim kur u ngrit komisioni i Reformës Territoriale, për të cilin edhe u anatemova për mënyrën pse u ngrit, mos ka ndonjë “Pazar”, gjithsesi këto janë çështje që i kam hedhur pas kurrizit. Që në atë moment ishte hapur ftesa për secilin nga anëtarët e grupit parlamentar që të ishin pjesë. Një pjesë u përgjigjen, një pjesë jo. Pavarësisht kësaj, pas ngritjes së komisionit, në korrik dhe gusht, të ftuar kanë qenë të gjithë deputetët. Konstatova një mospjesëmarrje të tyre. Edhe para një jave zonja Çupi me zotin Bylykbashi dhe Asllani me idenë e mirë për çdo sugjerim konstruktiv që të bëhen pjesë të projektligjit final. Ndeshi në refuzim. Megjithatë edhe në këto momente, edhe tani pasi është depozituar pr.ligji nga ana jonë, jemi të hapur për çfarëdolloj sugjerimi konstruktiv të paraqitet si amendament dhe ta mbështesim. Më shumë se kaq besoj se nuk kam se çfarë të bëj.
