Kryetari i Partisë Demokratike, Sali Berisha i është përgjigur nga Gjirokastra, sfidës së hapur që i bëri pasditen e sotme deputeti Enkelejd Alibeaj.
Alibeaj i pyetur për ftesën e Berishës për t’u bashkuar me një draft për Reformën Territoriale, i shkoi më thellë çështjes duke thënë edhe se PD ligjore që ai njeh dhe që përbëhet nga grupi i deputetëve që e ndjek, do të dalë me kandidatët e saj në zgjedhje.
Dhe përgjigjen për këtë, Berisha ia dha menjhëherë ndonëse nuk e përmendi me emër. Ai e lidhi reagimin jomiqësor të deputetit Alibeaj me “përpjekjet e Edi Ramës për të parandaluar fitoren e opozitës”.
I pyetur nëse Gjykata e Apelit nuk shprehet për vulën dhe logon, a do t’i kërkonte sërish përfshirjen në zgjedhje të kandidatëve të PD nën siglën e Partisë së Lirisë, Berisha me diplomaci iu përgjigj duke thënë: “Çdo përpjekje e Edi Ramës për të parandaluar fitoren e opozitës dhe rikthimin e saj në pushtet do të dështojë në mënyrën më të plotë”.
