Detaje të reja janë zbardhur nga dosja hetimore për dy vëllezërit Indrit dhe Gentian Beqiraj, të cilët ranë në pranga, pasi u mor peng njëri prej tyre nga të besuarit e Aleksandër Lahos (alias Pëllumb Muharremi), i njohur ndryshe edhe si “Rrumi i Shijakut”.
Pasi hodhën dritë mbi masakrën e Don Boskos duke nxjerrë emrin e Kasandër Nogës si porositës dhe Kevin Zenelit si ekzekutor i të pafajshmit Erjon Çela, vëllezërit Beqiraj kanë zbuluar edhe prorsitësin e atentatit ndaj Arben Mërkurit, i njohur si “Maneci”.
Vrasja e “Manecit” ndodhi pranë Sukthit më 18 Maj të 2022 dhe sipas “pentitove” të drejtësisë u porosit nga një person të cilit viktima dyshohej se i kishte ekzekutuar një të afërm.
Në dosjen hetimore, të cilën Tv Klan e disponon, dy vëllezërit kanë treguar se personi i interesuar për vrasjen e Mërkurit ka ardhur nga jashtë vendit dhe shuma e premtuar për këtë ekzekutim ishte 150.000 Euro. Komunikimi bëhej me anë të një aplikacioni.
“Personi interesuar komunikonte me aplikacionin SINJAL me Kevin dhe nga e folura i patëm vendosur pseudonimin “Katunari”. Ai dyshohej se ishte i zonës pasi kishte dhe një person që na informonte në zonë për lëvizjet e Benit. Me sa kam dijeni ky person është larguar jashtë vendit. Nuk e di se ku është personi që porositi këtë vrasje dhe sipas Kevit, Arbeni dyshohej për vrasje të një të afërmit të këtij personi”.
Mes rrëfimeve të dy vëllezërve, ata kanë treguar se makina tip Mercedes Benz E Class që shihni në këto pamje, e cila u përdor në vrasjen e Don Boskos, ishte marrë prej tyre për të ruajtur lëvizjet e Manecit. Edhe pse vëllezërit kanë treguar pjesëmarrësit në ekzekutimin e tij, policia dhe prokuroria nuk kanë mundur ende të zbulojnë porositësit.
