Ditën e sotme ka qarkulluar në media lajmi se Prokuroria e Tiranës ka vendosur të mos nisë hetimet për Autoritetin për Informim mbi Dokumentet e ish-Sigurimit të Shtetit, pas kallëzimit të bërë nga ish-presidenti Ilir Meta.
Mirëpo ky lajm është përgënjeshtuar nga avokati Genc Gjokutaj i cili shprehet se faktet dhe provat e shkeljes së ligjit dhe të manipulimit nga Autoriteti i Dosjeve janë të qarta dhe mbyllja e çështjes është e pamundur.
” Sa me siper ne cilesine e avokatit te Z. Ilir Meta dhe nen pergjegjesine time ligjore dhe morale shpreh besimin se ky njoftim duhet te jete nje fake neës, sepse faktet dhe provat e shkeljes se ligjit dhe te manipulimit nga Autoriteti i Dosjeve jane te qarta, flagrante dhe te pakontestueshme sa qe mbyllja eshte nje opsion juridik i pamundur”, ka thënë Gjokutaj.
Meta kallëzoi penalisht në fillim të shtatorit Autoritetin e Dosjeve, duke pretenduar se drejtuesit dhe anëtarët kishin kryer shkelje të rënda, ndër të tjera edhe falsifikime, për llogari të kryeministrit Edi Rama, në mënyrë që të përdornin një dosje të falsifikuar ku ai aludohet si ish-spiun i Sigurimit, për shantazh politik.
Sipas Metës, Autoriteti i Dosjeve kishte kryer 6 vepra penale, ndër to edhe “përhapja e informatave të rreme që shkaktojnë panik”. Beteja mes Metës dhe institucionit nisi gjatë muajit gusht, kur Autoriteti deklaroi se në postet e larta të politikës ka ish-bashkëpunëtorë të ish-Sigurimit, ndër ta edhe politikani me inicialet I.M.
Menjëherë u aludua se bëhej fjalë për ish-presidentin Ilir Metaj i cili kishte spiunuar shokun student gjatë tentativës për t’u arratisur nga vendi, por ky i fundit i hodhi poshtë akuzat.
