Fatjon Hajdari, një nga 14 personat që u arrestua në kuadër të operacionit “Pororistësit” dhe që u la i lirë nga Gjykata e Durrësit ditën e sotme, ka folur për mediat.
Ai ka mohuar të ketë lidhje me vëllezërit Indrit dhe Gentian Beqiraj, të cilët zbuluan autorët e “Masakrës së Don Boskos” dhe disa vrasje të tjera, ku përfshihet edhe përgatitja e një atentati ndaj “Rrumit të Shijakut”, Pëllumb Muharremit.
“Asnjë nuk pranoi akuzën nga ato personat. Që thanë se i kena shit, i kemi ble armët e kanë ngatërruar dynjanë. Këtë e bëjnë për të përfituar azil të ikin jashtë shtetit. Kanë bërë krimet e veta dhe tani kanë shtuar edhe këtë për shitje armësh, duan vetëm të ikin jashtë shtetit që ti mbrojë shteti”, tha ai.
Gjithashtu, Hajdari i cili rezulton të jetë profesor në Durrës ka thënë se në shtëpinë e tij policia i ka gjetur një armë me leje, ndërsa lidhja me vëllezërit Beqiraj është bërë për shkak të kontakteve që ka pasur me ta vëllai i tij me të cilin jeton në të njëjtën shtëpi.
Ju kishit njohje me vëllezërit Beqiraj?
Hajdari: Jo unë jo kishte vëllai, i njeh.
Për çfarë u akuzove?
Hajdari: Kanë bërë shpifje. Kanë kontrolluar banesat dhe kanë shpifur për vëllain. Kur erdhën tek banesa jonë më gjetën armë me leje. Përderisa i kam armët me leje më liruan sot. Ato tjerët po i mbajtën sërish 45 ditë. Kanë shpifur dy persona, kanë armë me leje…
A i njihni dy personat?
Hajdari: S’kanë thënë për mua, kanë thënë për vëllain tim dhe të tjerë.
U akuzuat për grup të strukturuar kriminal?
Hajdari: Ato jo unë, po ngaqë jetoj me një shtëpi me vëllain më morën edhe mua. Vëllai është Alban Hajdari.
