Gjykata liron nga qelia e burgut ish-deputetin e PS-së Alqi Bllakon.
Mësohet se Gjykata vendosi caktimin e masës “arrest shtëpie” për Alqi Bllakon, i cili ishte pas hekurave pas akuzave për inceneratorin e Fierit. Nga informacionet paraprake bëhet me dije se ish-deputeti është liruar për arsye familjare.
Vendimi është dhënë nga gjyqtarja Irena Gjoka e cila është komanduar si drejtuese e Gjykatës së Posaçme. Ish-deputeti i Partisë Socialiste ka kërkuar dhe herë të tjera të lirohet nga burgu.
Bllako ka depozituar në Apelin e Gjykatës së Posaçme më para kërkesën për ndryshimin e masës së arrestit me burg. Bllako pretendonte se nuk ekziston dyshimi i arsyeshëm për kryerjen e veprave penale prej tij dhe nuk ekzistojnë kushtet ligjore për masën e “arrestit në burg”.
Pse u arrestua Alqi Bllako?
Bllako akuzohet për korrupsion dhe shpërdorim detyre, pasi sipas SPAK ai akuzohet se ka falsifikuar dokumente shpronësimi për një tokë që nga arë ishte kthyer në truall dhe dokumentet e falsifikuara i janë paraqitur Këshillit të Ministrave, tokë mbi të cilën do ndërtohej inceneratori i Fierit. Kjo shkelje, thotë Prokuroria e Posaçme, është bërë në bashkëpunim me ish-ministrin e Mjedisit Lefter Koka dhe kryetarin e shpronësime, Pëllumb Abeshi.
SPAK ka nënvizuar se nga hetimet e kryera kanë rezultuar të dhëna se nga ana e shtetasit Alqi Bllako, gjatë kohës që ka shërbyer në fillim me funksionin Sekretar i Përgjithshëm i Ministrisë së Mjedisit dhe më pas Drejtor i Përgjithshëm i Agjencisë Kombëtare të Ujësjellës Kanalizimeve dhe Infrastrukturës së Mbetjeve (AKUM), është favorizuar shoqëria koncesionare “Integrated Technology Waste Treatment Fier” sh.p.k., kundrejt marrjes në mënyrë të tërthortë të përfitimit të parregullt në shumën prej 14,964,900 (katërmbëdhjetë milion e nëntëqind e gjashtëdhjetë e katër mijë e nëntëqind) lekë. Përfitimi i parregullt dyshohet se mund të jetë marrë përmes rrogës së babait të tij në një nga kompanitë e inceneratorit. Në 16 muaj, ai është paguar 14.964.900 lekë nga Inceneratori i Tiranës. Këto të ardhura janë përfituar në tre mujorin e fundit të vitit 2018, në vitin 2019 dhe në janar të vitit 2020. Por se si e ka përfituar shumën SPAK nuk e saktëson në njoftimin e tij.
