Koalicionet në zgjedhjet lokale të 2023 kanë qenë tema e ditës përgjatë kësaj jave, me opozitën që duket se do të dalë me kandidatë të përbashkët, në mënyrë që të maksimizojë votën kundër mazhorancës së Edi Ramës.
Por teksa Ilir Meta, Fatmir Mediu, Agron Duka dhe aleatët e tjerë të vegjël i kanë shprehur besnikërinë Berishës dhe mund të tolerojnë duke u bërë pjesë edhe të primareve në Partinë Demokratike, duket se PDIU është e paqartë në qëndrimin e saj.
Të paktën këtë ka lënë të kuptohet kreu i saj, Shpëtim Idrizi, i cili u shpreh i hapur pak ditë më parë që kartat janë në tryezë për çdo koalicion, përfshirë edhe një me Partinë Socialiste në pushtet.
Deklaratën e Idrizit e ka komentuar sot në ABC, drejtuesi politik i PS në qarkun e Vlorës, Blendi Klosi i cili tha se PS aleancën e ka me qytetarët dhe se opozitën mund ta mundin si veç e veç, po ashtu dhe në grup.
“PS është një parti shumë e madhe e cila ka një votë aq të madhe, e cila na bëri në 2021 ta shprehnim aleancën tonë të madhe. Aleancën ne e kemi me qytetarët. Ne duam shumë që në çdo garë elektorale të jemi me qytetarët. Pastaj kush pranon programin e PS-së, parimin mbi të cilin krijohet ky program… Ne në gara të fituara i kemi mundur veç e veç, kur kanë qenë të fortë, kur kanë qenë të dobët”, deklaroi Klosi.
