Pedagogia Mirela Karabina thotë se kryeministri Edi Rama ka shantazhuar mësimdhënësit në sistemin universitar, duke thënë se ata nuk e meritojnë rrogën që marrin.
Në emisionin “Now” në Euronews Albania, u shpreh se kreu i qeverisë duhet t’i mbështesë kërkesat e tyre.
“Të flasësh kështu në erë, nuk është normale, të etiketosh pedagogët. Sa herë ka një problem, sa herë ka një zë qytetar, gjithmonë ka një shantazh. Këtë e ka filluar kryeministri që me ngritjen e pedagogëve më 15 shtator dhe u kujtoi atyre që nuk e meritojnë pagën që kanë. Kryeministri nuk është aty për të denoncuar, kryeministri është aty për të vepruar, për të mbështetur universitetin. Nëse ai realizon detyrat që ka, ka mekanizma që kontrollojnë dhe vlerësojnë punën e tyre”, theksoi ajo.
Sindikatat kërkojnë përmes protestave dhe presionit për bojkot, që pagat e pedagogëve të rriten 30% në këto momente.
Por, qeveria në përgjigjen e parë që ka dhënë ka dalë me vendimin për t’i rritur 7%, duke dhënë sinjale për një rivlerësim në vitin 2023.
