Në një kohë që në selinë e Kuvendit u mbyll pas 1 ore e gjysmë takimi mes ambasadores Yuri Kim dhe kolegëve të saj nga selitë diplomatike të vendosura në Tiranë me grupin e deputetëve të drejtuar nga Enkelejd Alibeaj, në selinë blu është mbledhur grupi parlamentar.
Në një takim të hapur për mediat, Sali Brisha ka prezantuar propozimin zyrtar të Partisë Demokratike për Reformën Territoriale Administrative, duke sfiduar projektligjin nga grupi tjetër që u dorëzua sot në Kuvend.
Teksa projektligji i Alibeajt propozon shtimin e numrit të bashkive nga 61 në 94 dhe ndarjen e Shqipërisë në 3 ose 6 rajone, drafti i PD që është hartuar nën drejtimin e Oerd Bylykbashit është përgatitur duken ndjekur shembullin zvicerian dhe suedez të ndarjes kantoniale.
Por ajo çka ra në sy në deklaratën për shtyp të Berishës ishte thirrja e tij për bashkim drejtuar grupit të deputetëve që drejtohet nga Alibeaj, duke thënë se është në interesin q eytetarëve që e gjithë opozita të dalë e bashkuar në propozimin e saj për Territorialen përballë Edi Ramës.
“Në këtë reformë janë mbajtur parasysh ndryshimet e thella demografike, sociale që ka pësuar vendin gjatë këtyre viteve. Sot dëgjoj që një grup deputetësh po të kësaj partie në mënyrë të pavarur kanë dorëzuar një draft me 94 bashki. Unë mendoj se ky draft i dorëzuar dhe ky që është përgatitur këtu, le të ulen bashkërisht dhe le të arrihet në një draft të PD, i cili të përfaqësojë interesat më të mira të qytetarëve shqiptarë. Nuk ka asnjë gjë, edhe një deputet i vetëm mund të paraqesë një ligj. Por ulja e përbashkët me ta në Komisione dhe jashtë tyre për gjetjen e një ujdie që ta mbështesin të gjithë deputetët e opozitës duhet. Mendoj se duhet të diskutohet edhe me aleatët opozitarë dhe me Partinë e Lirisë, në mënyrë që të krijojmë një mbështetje panopozitare”, tha Berisha.
Por kreu i PD hodhi poshtë në mënyrë kategorike bërjen pjesë të selisë blu në një lojë pazaresh dhe kulisash me Edi Ramën për reformën e re që do të rrëzojë atë të 2015.
“Natyrisht ne kurrë nuk bëhemi pjesë e një loje të qeverisë dhe as të pazareve me të. Projekti ynë është publik, me interesat më të mira. Nuk besoj se Edi Rama është serioz në çështjen e reformës. Ai s’do dhe gënjen, por pavarësisht mendoj se ishte në detyrimin tonë që të përgatisnim projektin më të mirë që ne gjykojmë”, shtoi ish-kryeministri.
