Në një kohë që qeveria nuk ka dhënë ende një draft për amnistinë fiskale, kreu i BSH-së thotë se kjo nismë mund të jetë pozitive për ekonominë e vendit, por njëkohësisht shton se është edhe rrezik serioz për pastrimin e parave.
“Amnistia ka impakt pozitiv dhe do të sjellë likuiditete e do të ndihmonte buxhetin e shtetit. Kostot janë rreziku nga pastrimi i parave, duhet shmangur ky rrezik dhe paratë që vijnë nga kriminaliteti e korrupsioni. Kemi theksuar që Amnistia duhet bërë e studiuar që të jetë instrument që të funksionojë për përmirësim të administrimit fiskal, për të shmangur evazionin fiskal”, tha guvernatori i BSH-së, Gent Sejko.
Qeveria nuk ka ende gati një draft final për amnistinë fiskale, një nga nismat më të debatuara, për të cilën faktori ndërkombëtar ka shprehur rezerva.
