Sekretari i Përgjithshëm i Partisë së Lirisë, Tedi Blushi, teksa ka postuar një video, ka deklaruar se betonizimi i kryeqytetit ka nisur në kohën e Edi Ramës dhe po vijon me Veliajn.
Me anë të një postimi në FB, Blushi e ka cilësuar masakrën e gjelbërimit tek Kopshti Zoologjik si një ndër krimet më të shëmtuara ndaj kryeqytetit.
“Shpërfytyrimi dhe asfiksimi i Tiranës nga betoni nisi me Edi Ramën dhe po vazhdon me barbari të pashembullt nga Erion Veliaj! Masakra e gjelbërimit tek Kopshti Zoologjik është një nga krimet e tyre më të shëmtuara ndaj kryeqytetit”, shkruan Blushi.
Ai shtoi se krimet e bëra ndaj Tiranës nga dyshja Rama-Veliaj, nuk do të amnistohen kurrë.
“I vetmi mision dhe vizion i bandës Rama-Veliaj për Tiranën është pasurimi me paratë e kullave të betonit që qelben era mafie, në kurriz të ajrit të pastër që duhet të thithin mushkëritë e qytetarëve dhe zaptimit taleban të hapësirave publike. Shkatërruesit e kryeqytetit Rama-Veliaj meritojnë ndëshkim popullor dhe ligjor! Krimet e tyre ndaj Tiranës nuk do të amnistohen kurrë!”, përfundon Blushi.
