“Në kohën e Kodhelit dhe Sajmir Tahirit ka ndodhur trafiku i organizuar është fakt që e dinë të gjithë agjencitë dhe që ditët e javët në vijim do të dalin të gjitha lidhjet”.
Ky është paralajmërimi i bujshëm që ka bërë ish komandanti Forcave Speciale, koloneli Dritan Demiraj, i cili drejtoi përkohësisht edhe ministrinë e Brendshme.
Teksa ishte duke shpjeguar specifikën e sulmeve kibernetike dhe rënien në dorë të hakerave të Homeland Justice, të sistemit “MAMEX”, ku policia ruan dosjet e perssonave nën hetim, Demiraj zbuloi se do të dalin emrat e atyre “që kanë fikur me qëllim radarët, siç kanë deklaruar vetë në Itali, personat që paguanin 10-20 mijë euro”.
Sipas kolonelit, shërbimet sekrete perëndimore kanë detaje për përfshirjen e politikanëve apo ish-politikanëve në raporte të afërta me bandat e krimit të organizuar ndaj është e “pamundur mbrojtja e mos daljes së tyre”.
“Numri i personave të përfshirë në krime, në 2013 që PS ka marrë qeverinë ka pasur 37 mijë persona të lidhur, të përfshirë në një formë a në një tjetër, sot ajo listë ka kaluar në mbi 100 mijë, që do të thotë është pasqyrim i rendit publik. Grupet kriminale janë të lidhura me pjesën e politikës, kryesisht me Partinë Socialiste. Dalja e këtyre informacioneve është shumë e dëmshme, por do tregojë dhe një pjesë e këtyre personave që janë të lidhur me krimin”, tha ai.
Teksa vijoi konstatimet për lidhjet e politikanëve të Partisë Socialiste me krimin, ai tha se për shkak të presionit nga jashtë ‘po i lëshojnë’ personat që kanë mbrojtur deri tani dhe në muajt në vazhdim do dëgjojmë gjëra që as nuk imagjinohen.
“Ju kujtohet se si në 2013, 2017 merrej në telefon, paguhej në Ministrinë e Mbrojtjes dhe mbylleshin radarët për të lejuar skafet gjë që unë i kam tërheq vëmendjen Kodhelit në atë kohë. Gjykoj që është shumë problematike dhe t’ia lëmë kohës. Këto po e nxjerrin në mënyrë të planifikuar çdo informacion. Është e qartë që politikanë që kanë pasur lidhje me krimin tani nuk i mbrojnë dot më për shkak të presioni nga jashtë.
Madje më lejo të siguroj në muajt në vazhdim, për shkak të presionit të madh, politikanë që kanë lidhje me krimin do i lëshojnë njerëzit që i kanë mbrojtur deri tani dhe do shohim dhe do dëgjojmë gjëra që nuk imagjinohen që për një pjesë të madhe pa diskutim kemi informacione të sakta”, theksoi Demiraj.
