Detaje të reja janë zbuluar nga pengamarrja e Indrit Beqirajt ditën e djeshme.
Ngjarja ndodhi në autostradën Tiranë-Durrës, ku dy vëllezërit Indrit dhe Gentian Beqiraj, me precedent të mëparshëm penal për trafik droge dhe armëmbajtje pa leje, u rrahën dhe më pas njeri prej tyre u mor peng.
Mësohet se një mjet me 4 persona u ka prerë rrugën vëllezërve Beqiraj, të cilët po udhëtonin me një motor dhe më pas janë konfliktuar me njëri-tjetrin.
Më pas personat që ishin në mjet kanë marrë me forcë njërin prej vëllezërve, konkretisht Indrit Beqirajn, kanë ecur për rreth 500 metra, por më pas e kanë lënë të lirë dhe janë larguar.
Sipas informacioneve dyshohet se autorët e pengmarrjes, janë pjesë e shoqërisë së dy vëllezërve Beqiraj, ndërsa shtohet se shkak për ngjarjen është bërë shitja e armëve të zjarrit.
Por kjo nuk është pista e vetme pasi policia po heton edhe mundësinë e një konflikti të çastit, ose dhe prishje të pazareve të drogës.
Sa u përket vëllezërve Indrit dhe Gentian Beqiraj, ata janë persona me precedentë penalë pasi në vitin 2013 janë kapur për trafik të lëndëve narkotike dhe armëmbajtje pa leje.
